महिला फुटसलको उपाधि सुवन एनएफसीले जित्यो
अमिर योन्जन । प्रथम आस्याङ फुटसल प्रतियोगितामा महिलातर्फ सुवन नेपाली फुटबल क्लबले उपाधि जितेको छ । सुवन एनएफसीले ख्याङ्नाम युनाइटेडलाई ३-२ गोल अन्तरले जितेको हो । आइतबार दिउसो ह्वासङ सी फरानमा भएको प्रतियोगितामा सुवन एन एफसीले उपाधि ट्रफीसँगै, नगद ४ लाख वन, मेडल र प्रमाणपत्र प्राप्त गरेको थियो । ख्याङ्नाम एफसीले उपविजेतामा चित्ता बुझाउनु परेको थियो । उनीहरूले पनि २ लाख वन, मेडल, ट्रफी र प्रमाणपत्र प्राप्त गरेका छन् ।
निर्धारित समयको पहिलो हाफसम्म १-१ गोलको बराबरी खेलेको थियो । दोस्रो हाफको खेलमा ख्याङ्नाम एफसीका क्याप्टेन परी गुरुङले आत्मघाती गोल गरेपछि सुवन एन एफसीले अग्रता लिएको थियो । दोस्रो हाफमा फेरी ख्याङ्नाम एफसीका खेलाडी सृष्टि लामा तामाङले गोल फर्काएपछि २-२ गोलमा बराबरी भएको थियो । निर्धारित समय सकिनै लाग्दा सुवन एनएफसीका खेलाडी गोल गरेपछि सुवनले ३-२ गोलमा जित निकाल्दै समय सकिएको थियो ।
प्रतियोगितामा उत्कृष्ट खेलाडी सुवन एनएफसीका एलेक्स, उत्कृष्ट गोलरक्षकमा ख्याङ्नाम एफसीका अन्जिला लामा र धेरै गोलकर्तामा २ गोल गरेकी ख्याङ्नाम एफसीका सृष्टि लामा तामाङ घोषित भएको थियो । उनीहरूले जनही ५० हजार वन, ट्रफी र प्रमाणपत्र पाएको थियो ।
आस्याङ फुटबल क्लबका अध्यक्ष सुवास लामा, लालीगुराँस रेस्टुराँको सञ्चालक तथा व्यवसायी खगेन्द्र खत्री, नेपाल महिला फुटबल परिवारका अध्यक्ष तथा जेबी बैङ्कका डा. कमला साउद, ह्वासङ परिवार दक्षिण कोरियाका महासचिव गोविन्द अधिकारीलगायतले पुरस्कार वितरण गरेको थियो ।
