लगानीको अर्को मौका, ३२ लाख कित्ता साधारण शेयर निष्काशन गर्दे दोर्दीखोला हाईड्रो
काठमाडौं – दोर्दी खोला हाईड्रोपावर प्रोजेक्टले सर्वसाधारण र स्थानीयवासीका लागि करिव ३२ लाख कित्ता साधारणशेयर निष्काशन गर्ने भएको छ ।हिमालयन पावर लिमिटेडले प्रवद्र्धन गरेको कम्पनीले ३२ करोड रुपैयाँ बराबरको साधारण सेयर निश्कासनका लागि ग्लोबल आइएमई क्यापीटललाई बिक्री प्रवन्धकमा नियुक्त गरेको छ ।
तर कम्पनीले सेयर निश्कासनका लागि धितोपत्र बोर्डबाट अनुमति पाउन भने बाँकी छ । कम्पनीले ३१ करोड ९६ लाख २५ हजार एक सय रुपैयाँ बराबरको ३१ लाख ९६ हजार २ सय ५१ कित्ता साधारण शेयर जारी गर्दैछ । उक्त सेयरमध्ये १० प्रतिशत आयोजना प्रभावित क्षेत्रका स्थानीयवासीका लागि छुट्याईएको छ ।
हिमालयन पावरले २०६८ सालमै उर्जा मन्त्रालयबाट लमजुङ्गको दोर्दी खोलामा २७ मेगावाट क्षमताको विद्युत उत्पादन गर्न अनुमति पाएको थियो । कम्पनीले २०६९ मा नेपाल विद्युत प्राधिकरणसंग विद्युत खरिद बिक्र्री सम्झौता समेत गरिसकेको छ ।
हालसम्म आयोजनाको सडक, पुल लगायत भौतिक पूर्वाधारका काम पुरा गरिसकेको छ भने सिभिल कार्य, मेशिनरी औजार खरिदका लागि पनि सवै ठेक्काहरु सम्झौता भै काम शुरु भैसकेको कम्पनीले जनाएको छ ।
