नेपाली टिम HORRA Esports PMSL मा उपविजेता हुदैं PMGC मा छनौट
नेपाली ई-स्पोर्ट्स इतिहासमा एउटा स्वर्णिम अध्याय थपिएको छ । हिजो अर्थात् सन् २०२५ जुन २२ आइतबार सम्पन्न PMSL (PUBG Mobile Super League) प्रतियोगितामा चाईनिज टिम अल्फा गेमिङ विजेता हुदाँ नेपालको तर्फबाट उत्कृष्ट प्रदर्शन गर्दै HORRA Esports दोस्रो र पाकिस्तानी 4T SPORTS ले तेस्रो स्थान हासिल गरेको छ । अल्फा गेमिङ, होरा स्पोर्टस् र फोटी स्पोर्टस् अगामी जुलाईमा साउदी अरबमा हुने प्रतिष्ठित PMGC (PUBG Mobile Global Championship) मा छनोट हुन सफल भएको छ । HORRA Esports को यो सफलताले नेपाललाई विश्व ई-स्पोर्ट्सको मानचित्रमा गौरवशाली उपस्थिति दिलाएको छ ।
PMSL प्रतियोगितामा HORRA Esport को यात्रा साँच्चिकै प्रेरणादायक रह्यो । उनीहरूले हरेक खेलमा धैर्यता, रणनैतिक सुझबुझ र उत्कृष्ट टिमवर्कको प्रदर्शन गरे । तीव्र प्रतिस्पर्धाका बाबजुद, HORRA Esport ले आफ्नो स्थान सुरक्षित राख्न सफल भयो र अन्ततः दोस्रो स्थान प्राप्त गर्यो । यो उपलब्धिले नेपाली गेमिङ समुदायमा ठूलो उत्साह छाएको छ ।
दोस्रो स्थान हासिल गरेबापत उपविजेता HORRA Esport ले २२ हजार ३ सय ५० अमेरिकी डलर अर्थात करिब २९ लाख ६४ हजार रूपैया नगद पुरस्कार जितेको छ । यो पुरस्कारले टिमका सदस्यहरूलाई थप प्रोत्साहनका सगैं उनीहरूको भविष्यको लागि आर्थिक रूपमा पनि सहयोग पुग्नेछ । साथै उनीहरूले विश्वभरका लाखौं गेमरहरूमाझ आफ्नो पहिचान बनाउन सफल भएका छन् ।
नेपालमा ई-स्पोर्ट्सको विकासमा DRS GAMING को भूमिका अतुलनीय छ । लामो समयदेखि DRS GAMING ले नेपाली ई-स्पोर्ट्सलाई अन्तर्राष्ट्रिय स्तरमा चिनाउन महत्त्वपूर्ण योगदान दिँदै आएको छ । DRS Gaming ले ईन्डोनेसियाको जकार्तामा सन् २०२३ मा जनवरी ६ देखि ८ सम्म आयोजना भएको PMGC (PUBG Mobile Global Championship) मा दोस्रो स्थान हासिल अमेरिकी डलर २,९२,००० अर्थात करिब ३ करोड ८६ लाख रूपैंया राशी प्राप्त गर्न सफल भएको थियो । DRS GAMING को यो सफलता नेपालमा ई-स्पोर्ट्सको लागि एउटा बलियो आधार बनिरहेको छ ।
HORRA Esport को यो सफलताले DRS GAMING को विरासतलाई थप उचाइमा पुर्याएको छ । यसले नेपाली ई-स्पोर्ट्सको भविष्य उज्ज्वल रहेको संकेत गर्दछ । अब नेपाली गेमरहरूले विश्व मञ्चमा आफूलाई प्रमाणित गर्न सक्ने क्षमता राख्छन् भन्ने कुरा HORRA Esport ले प्रमाणित गरिदिएको छ ।
HORRA Esport को PMGC मा छनोटले नेपाली ई-स्पोर्ट्सका लागि नयाँ सम्भावनाका ढोकाहरू खोलेको छ। यसले युवा गेमरहरूलाई ई-स्पोर्ट्सलाई करियरको रूपमा अपनाउन प्रेरित गर्नेछ। सरकार, निजी क्षेत्र र गेमिङ समुदायको संयुक्त प्रयासले नेपालमा ई-स्पोर्ट्सलाई थप व्यावसायिक र सुदृढ बनाउन सकिन्छ । अब सबैको ध्यान HORRA Esport को PMGC मा हुने प्रदर्शनमा केन्द्रित हुनेछ, जहाँ उनीहरूले विश्वभरका उत्कृष्ट टिमहरूसँग प्रतिस्पर्धा गर्नेछन् र नेपालको नाम अझ उच्च पार्ने प्रयास गर्नेछन् । समस्त नेपाली गेमिङ समुदाय HORRA Esport को सफलताको लागि शुभकामना व्यक्त गर्दछ ।
