कोरियाको छाङ्वनमा हुने २० औं “माम्फ” मा नेपालबाट गायिका मिलन नेवार आउदै
कोरियाको छाङ्वन शहरमा हरेक वर्ष हुदै आएको बहुसाँस्कृतिक कार्यक्रम ‘माइग्रेन्ट आरिराङ् मल्टिकल्चरल फेस्टिभल (माम्फ) यहि अक्टोबर २४, २५ र २६ तारिख हुने भएको छ। ख्याङनाम माइग्रेन्ट सेन्टर र माम्फ आयोजक कमिटिले आयोजना गर्दै आएको २० औं माम्फमा हरेक वर्ष झैं यो पटक पनि नेपाल, चीन, जापान, म्यानमार, मंगोल, भियतनाम, थाइल्याण्ड, उजबेकिस्तान, पाकिस्तान, कम्बोडिया, फिलिपिन, श्रीलंका, बंगलादेश, इन्डोनेसिया, जापान र दक्षिण कोरिया गरी १६ मुलुकको सहभागिता रहने छ। तीन दिनसम्म चल्ने माम्फ कार्यक्रममा सहभागी राष्ट्रहरूले आ–आफ्नो मौलिक कला, भेषभूषा र संस्कृतिको झल्को दिने प्रस्तुतीमार्फत विश्वसामु आफ्नो देशको परिचय दिनेछन्। माम्फको विशेष आकर्षण धामुन्ह्वा परेडमा यो पटक नेपालको तर्फबाट नेवारी समुदायको कुमारी रथ यात्रा , लाखे नाच र धिमे नाचलाई प्रस्तुत गरिने भएको छ। साथै, एशियाली संगीत कन्सर्टका लागि नेपालका चर्चित राष्ट्रिय कलाकार मिलन नेवार आउने भएकी छन्।
विभिन्न मुलुकको कला, संस्कृति र भेषभूषालाई एकै स्थलमा प्रस्तुत गरिने कार्यक्रम माम्फमा विभिन्न मुलुकबाट कलाकारहरु आएर आफ्नो साँगीतिक प्रस्तुती पस्कने छन् भने स्थानीय कलाकारहरूको विविध प्रस्तुती रहने उक्त फेस्टिभलमा विभिन्न मुलुकलाई चिनाउने कला प्रदर्शनी र विविध सामग्रीसहितको स्टलहरु राखिने छ।
हजारौं दर्शकहरुको उपस्थिति रहने यस कार्यक्रममा कोरियाको राष्ट्रिय टेलिभिजन एमबिसि टेलिभिजनबाट प्रत्यक्ष प्रशारण गरिनुका साथै विभिन्न ४ मुलुकका टेलिभिजनबाट समेत प्रत्यक्ष प्रशारण गरिने आयोजकले जनाएको छ। कोरियाकै सबैभन्दा ठुलो बहुसाँस्कृतिक महोत्सव माम्फमा नेपालले पनि अन्य मुलुकहरु सँगै उत्साहजनक र उपलब्धिमूलक सहभागिता जनाउदै आएको छ। माइग्रान्च कार्यक्रममा स्थानीय कलाकारहरुको प्रस्तुती गीतसंगीत, हास्यव्यंग्य लगायतका रमाइलो कार्यक्रम रहने नेपाली टिमका सयोजक ख्यङनाम नेपाली समाजले जनाएको छ।
त्यसैगरी तीन दिनसम्म चल्ने धामुन्ह्वा छेहम बुथमा नेपाली पोशाक लगाउने, नेपाली बाजाहरुको प्रदर्शनी र बालबालिकाहरुको लागि कागजको नेपाली राष्ट्रिय फूल लालिगुराँस बनाउने योजना रहेको आयोजकले जनाएको छ।
