झोगेसा गुम्बाको कार्यक्रम तयारी पुरा
धन गुरुङ
सोल-अक्टोबर १८ तरिख आइतबार बुद्धिस्टहरुको महायान ग्रुप झोगेसा गुम्बाको बिदेश बिभागले आयोजना गर्न लागेको अन्तर्राष्ट्रिय खेलकुद तथा साँस्कृतिक कार्यक्रमहरुको तयारी पूरा भएको छ । उक्त कार्यक्रममा नेपालको प्रतिनिधि संस्थाको रुपमा सहभागीता जनाउन लागेको बौद्ध परिवार दक्षिण कोरियाको अध्यक्ष ईश्वर गुरुङले बताए ।
अन्तर्राष्ट्रिय खेलकुद तथा साँस्कृतिक कार्यक्रममा नेपाल, थाइल्यान्ड , मंगोल, चीन, बर्मा , भियतनाम , श्रीलंका र लाओस देशका कोरियामा संगठित संस्थाहरुको सहभागीता रहने पक्का भएको छ । बौद्ध परिवारका अध्यक्ष गुरुङले जानकारी गराएअनुसार अन्तर्राष्ट्रिय स्तरको भलिबल र नृत्यमा नेपालले सहभागिता जनाउने भएका छन् ।
विभिन्न बिभागका संयोजकहरुको गत आइतबार सम्पन्न बैठकमा कार्यक्रमको सम्पुर्ण तयारीहरु पूरा भएको जानकारी गराइएको महासचिव प्रीतम गुरुङ्ले बताए । भलिबल संयोजकमा कृष्ण गुरुङ “ब्रो”, साँस्कृतिक संयोजक रमेश श्रेष्ठ, स्टल बुथ संयोजक पेम्बा ह्योल्मो, बस व्यवस्थापक प्रकाश लामा रहेका छन ।
कार्यक्रम अक्टोबर १८ तारीखमा छल्लदो छन्जुमा हुनेछ । कार्यक्रममा जानको लागि दोङ्देमुन मेट्रो ट्रेनको गेट नम्बर ३ मा अक्टोबर १८ तारिखको बिहान ७ बजे २ वटा बसको पनि व्यवस्था गरिएको छ ।
खेलाडी, कलाकार र दर्शकहरुका लागि उचित राशि र आकर्षक उपहारहरुको व्यवस्था रहेको हुँदा नाम दर्ता गराउनु भएका सम्पुर्ण महानुभावहरुलाई समयमै उपस्थित भै सहयोग गरिदिनु हुन अध्यक्ष ईश्वर गुरुङले अनुरोध गर्नु भएको छ ।
