बहुसाँस्कृतिक परेडमा नेपाल तेस्रो, नेपाली तारा प्रताप लामाको प्रस्तुतिसँगै दर्शक झुमे

‘यो नेपाली शीर उचाली संसारमा लम्कन्छ’, पृष्ठभूमिमा बजेको यो गीतसँगै सयौंको संख्यामा उपस्थित भएका नेपालीहरु आइतबार दक्षिण कोरियाको छाङवनमा भएको तीनदिने ‘माइग्रेन्ट आरिराङ मल्टिकल्चर फेस्टिभल (MAMF २०१५) ’ को अन्तिम दिन लामवद्ध हुँदै धामुन्ह्वा (बहुसाँस्कृतिक) परेडमा सहभागी भए । नेपालको कलासंस्कृति र भेषभूषा चिनाउने पहिरनमा उपस्थित भएका नेपालीहरुले विदेशी भूमिमा नेपाललाई चिनाइरहेका थिए । नेपाली पञ्चै बाजाकासाथमा मगर नृत्य र किरात राईको साकेला सिलीलाई महोत्सवमा स्थान दिइनुले पनि अन्य मुलुकबिच नेपाललाई चिनाउने राम्रो माध्यम बनेको थियो यो पटकको महोत्सव ।

ख्यङनाम माइग्रेन्ट सेन्टर र माम्फ आयोजक कमिटिले विगत दश वर्षदेखि आयोजना गर्दै आएको माइग्रेन्ट आरिराङ मल्टिकल्चर फेस्टिभलमा नेपाल, बंगलादेख, पाकिस्तान, श्रीलंका, इन्डोनेसिया, उज्बेकिस्तान, मंगोल, चीन, जापान, भियतनाम, फिलिपिन, कम्बोडिया, थाइल्याण्ड, लाओस, रसियालगायतका विभिन्न मुलुकहरुको सहभागिता रहेको थियो । आआफ्नो देशको कलासंस्कृति झल्कने पहिरनकासाथमा विभिन्न प्रस्तुति सहितको धामुन्ह्वा परेडमा यो पटक नेपालले १० लाख वनसहित तेस्रो स्थान ल्याउन सफल भयो भने पहिलो र दोस्रो भएका थिए, भियतनाम र इन्डोनेसिया । पहिलो र दोस्रो हुनेलाई क्रमशः ३० लाख र २० लाख वन प्रदान गरिएको थियो ।

गत शुक्रबार सुरु भएको महोत्सवको अवधिभर २० वटा मुलुकको खानाका स्टल तथा आआफ्नो मुलुकको कला र संस्कृति झल्कने सामग्रीहरु समेत प्रदर्शनीमा राखिएको थियो । नेपालको तर्फबाट भने लिटिल इन्डिया रेष्टुरेन्ट बुसानले नेपाली परिकारहरु राखेको थियो । त्यसैगरी स्थानीय कलाकारहरु सहित नेपालबाट आएका नेपाली तारा प्रताप लामाले गीत गाएर झण्डै सातसयको संख्यामा उपस्थित भएका नेपाली दर्शकहरुलाई भरपूर मनोरञ्जन प्रदान गरे ।

विभिन्न राष्ट्रका राजदूत, कुटनितिज्ञ तथा विशिष्ठ व्यक्तित्वहरुको उपस्थिति रहेको महोत्सवको समापन समारोहमा नेपाली राजदूत कमानसिंह लामाको पनि उपस्थिति रहेको थियो । प्रवासीहरुको लागि गरिने कोरियाकै यति ठुलो बहुसाँस्कृतिक महोत्सवमा सहभागी हुन पाउँदा धेरै खुशी लागेको बताउदै राजदूत लामाले हामी नेपाली जहाँ रहेपनि आफ्नो देशको कलासंस्कृतिलाई प्रवद्र्धन गर्नु पर्नेमा जोड दिए । उनले भने, ‘कला र संस्कृतिको ठुलो महत्व छ त्यसैले पनि हामीले आआफ्नो ठाउँबाट आफ्नो कलासंस्कृतिको प्रर्दशन र प्रवद्र्धन गर्दै विश्वमा नेपाल र नेपालीको पहिचान दिने काम गर्नु पर्छ ।’
त्यसैगरी आयोजक कमिटिका एक अध्यक्ष यज्ञराज सुवेदीले नेपाली कला र संस्कृतिलाई विदेशी भूमिमा चिनाउने काममा स्वयंसेवी भावनाले सहभागी भइ कार्यक्रमलाई सफल बनाउन उपस्थित प्रवासी नेपालीहरुलाई धन्यवाद व्यक्त गरेका छन् । कार्यक्रम सोचे भन्दा धेरै राम्रो भएको बताउदै नेपाली तयारी समितिका संयोजक हरि थपलिया सातसयको हाराहारीमा सहभागि नेपालीप्रति कृतज्ञता प्रकट गर्दै भने, ‘यतिका मुलुकबिचको प्रतिष्पर्धामा नेपाल तेस्रो हुनु नै ठुलो हो । यसमा हामी सबैको समर्थन र सहभागिताले गर्दा नै हो । आउने वर्षहरुमा पनि नेपालले राम्रो गर्नेछ भन्ने विश्वास लिएको छु ।’ त्यस्तै आयोजकको निम्तोमा कोरिया आएका नेपाली तारा प्रताप लामाले यस्तो ऐतिहासिक कार्यक्रममा सहभागि भएर आफ्नो गीत प्रस्तुत गर्न पाउँदा खुशी लागेको बताए ।

कोरियामा रहेका प्रवासी र आदिवासीसँगै मनाइने यस वर्षको पहिलो दिनको कार्यक्रम उदघाटनसँगै भियतनाममा लगानी सम्वन्धि केन्द्रीत रहेको थियो । त्यस्तै दोस्रो दिन अघिल्ला विभिन्न चरणहरुबाट छनौट भइ अन्तिम चरणमा पुगेका प्रवासीहरुबिच गायन प्रतियोगिता भएको थियो । जसमा फिलिपिनका दुइजना प्रतिभाले पहिलो र दोस्रो पुरस्कार पाउन सफल भए भने कम्बोडिया तेस्रो भएको थियो । उक्त गीतिप्रतियोगितामा प्रथम हुने प्रतिभालाई ५० लाख, दोस्रोलाई ३० लाख र तेस्रो हुने हुनेलाई १० लाख वन प्रदान गरिएको थियो ।