एनआरएन कोरियाको आसन्न अधिवेशन र नेपालीको चासो

आउदो सेप्टेम्बर ६ तारिखमा हुन गईरहेको एनआरएन कोरियाको अधिवेशनलाई लिएर विभिन्न चर्चा परिचर्चासंगै बिभिन्न पदमा धमाधम उमेदवारी घोषणा भईरहेको छ | चुनावी सरगर्मीसंगै यो चुनावमा पनि एनसीसीको चुनावमा देखिएको दृश्य दोहोरिने त होईन भनेर आशंका गर्नेहरु पनि थुप्रै छन् |

विश्वभर संजाल फैलिएको संस्थाको कुनै पनि पदमा बस्ने लालचा धेरैमा देखिएको छ | हुनत एनआरएन धनि र ठुलाबडाको संस्था हो पनि भनिन्छ | कोरियामा ईपिएस प्रणालीवाट आएको मजदुरको संख्या अरु भीसामा आएकाको भन्दा उल्लेनीय छ |

एनआरएनको बिधान अनुसार एनआरएनको सदस्यता लिन २ बर्ष विदेश बसेको अनिबार्य हुनु पर्ने हुन्छ | ईपिएसवाट कोरिया आउनेको विसा बोनस विसा सहित ४ वर्ष १० महिनाको हुन्छ यसकारण पनि ईपिएसवाट आएकाहरु एनआरएनको उमेदवार बन्ने सम्भावना देखिदैन | यसपाली ईपिएसवाट कोरिया आएका खेम कार्कीले अध्यक्षमा उमेदवारी घोषणा गरेका छन् तर उनि पनि दोस्रो पटक ईपिएसवाट कोरिया आएका हुन् | अध्यक्षका अरु प्रत्यासीहरु गैरआवासीय नेपाली र अन्य विसा प्राप्त गरेका नेपालीहरु हुन् |

ईपिएसवाट कृषि र उत्पादनमुलक क्षेत्रमा कोरिया आएका मजदुरहरुले बिभिन्न समस्या भोग्दै आईरहेका छन् | अब आउने भावी नेतृत्वले साग बारीमा काम गर्ने चेलीको ब्यथा होस् या कोरियन नागरिकसंग बिवाह गरेर आएर दुर्ब्यबहारमा परेका चेली कथा होस् या फलाम कम्पनीमा काम गर्दा संगै काम गर्ने कोरियन नागरिकले हातपात गर्दा चोट लागेको नेपाली मजदुरको पक्षमा बोल्ने र न्याय दिलाउन सक्ने खालको हुनु पर्छ भन्ने कोरिया रहने ईपिएस मजदुरको मान्यता हो |
भावी चुनौती र अवसर
यता चुनावी माहोल तातिरहेको भने उता एनआरएन कोरिया मुख्य आयोजक रहेर गत फेब्रुरीको सलनालामा आयोजना गरिएको महामेलाको आर्थिक आयव्यय अहिलेसम्म सार्वजनिक गर्न सकेको छैन | कार्यक्रम आयोजना गरिएको यति लामो समयसम्म पनि आर्थिक आयव्यय सार्बजनिक गर्न नसक्नुका पछाडी के कारण हो ? आउदो दिनमा अबश्य पनि खुल्दै जानेछन |

एनआरएन कोरियाद्वारा संचालित नेपाल हाउसलाई बृहत रुप दिएर नयाँ नेपाल हाउस निर्माण गर्न भनेर १० करोड उठाउने भन्दै महामेला आयोजना गरिएको थियो | कार्यक्रम आयोजना हुनु पुर्व नै कोरियामा रहेका नेपाली समुदाय र बिभिन्न संघ संस्थाहरुले १३ करोड ४१ लाख ३६ हजार ९३२ वन सहयोग गरेका थिए |

भावी नेतृत्वले बर्तमान कार्यसमितिले थालनी गरेको नयाँ नेपाल हाउसको योजनालाई साकार पार्दै नयाँ नेपाल हाउस निर्माण गरेर कोरियामा रहेका नेपाली समुदायको बिश्वास जित्नु पर्ने छ |

कोरियामा अहिले विभिन्न बिसामा आएका ३० हजारको हाराहारीमा नेपालीहरु छन् | अहिले पनि नेपाल पैसा रेमिट्यान्सवाट भन्दा अबैध हुण्डी मार्फत नेपाल जान्छ | यसरी हुण्डीको दलाली गर्ने अधिकांस नेपालीहरु गैरआवासिय नेपाली हुन् या बिजनेस विसामा रहेका नेपालीहरुले गर्दै आएको कुरा घाम जस्तै छर्लङ्ग छ |

पछिल्लो चरणमा नेपाल सरकार र राष्ट्र बैकले हुण्डी मार्फत नभई रेमिटयान्स मार्फत पैसा पठाउन आग्रह गर्दै हुण्डीलाई निरुत्साहित गर्न नयाँ नीति ल्याउने तयारी गरिरहेको बुझिएको छ | भावी नेतृत्वले नेपाल सरकारको कार्ययोजनालाई सफल बनाउन साथ दिदै नेपालमा लगानी भित्राउन पनि उत्तिकै सकारात्मक भूमिका खेल्नु पर्ने छ छ | अन्यथा एनआरएन धनी र ठुलाबडाको संस्था हों र एनआरएन काम भन्दा हल्ला बदि गर्छ भन्नेहरुलाई थप बल पुग्नेछ |