गोरखाको सिंजाली मा.विलाई कोरियाबाट संयुक्त रुपमा आर्थिक सहयोग हस्तान्तरण
सोल – नेपालमा गत बैशाख १२ र २९ गते आएको महाभूकम्पबाट ध्वस्त सिंजाली मा.बि. कोटगाउँ गोरखालाइ दक्षिण कोरियामा रहनु हुने भूतपूर्व ताक्लुङे बिद्यार्थी र नेपाल मगर संघ दक्षिण कोरियाद्वारा पुनर्निर्माणको निमित्त संयुक्त रुपमा रु ३ लाख १३ हजार सहयोग रकम हस्तान्तरण गरिएको थियो । गत साउन १५ गते विद्यालयको प्राङगणमा आयोजित एक कार्यक्रम बीच उक्त रकम हस्तान्तरण गरिएको हो।
कोरियामा रहनुहुने भूतपूर्व बिद्यार्थी सामाजिक कार्यमा सक्रिय अभियन्ता सुशीला थापा मगरको बिशेष अगुवाइमा रु २,५३,६६० र नेपाल मगर संघको भूकम्प राहत अभियान बाट रु ५९,३४० जम्मा गरी सो रकम हस्तान्तरण गरिएको हो।
मगर संघ दक्षिण कोरियाका प्रतिनिधि निवर्तमान महासचिव सि.पी.मगर सक्रिय सदस्य उमेश थापा मगर र सहजकर्ता राम बहादुर थापा मगर उपस्थित सो कार्यक्रममा बिद्यालयमा अध्ययनरत करीब ५०० बिद्यार्थी ,शिक्षक,ब्यबस्थापन समिति, अभिभावक संघका प्रतिनिधि लगायत अभिभावकहरुको बाक्लो उपस्थिति रहेको थियो।
कार्यक्रममा प्र.अ. बल नारायण श्रेष्ठ ब्यबस्थापन समिति अध्यक्ष रेशम बाबु बि.क. शिक्षक ध्रुव खनाल प्रतिनिधि सि.पी.मगरले सहयोग रकम र भावी योजनाको बिषयमा बोल्नुभएको थियो।
सोही कार्यक्रममा कतारमा रहनु हुने दम्पती तेज बहादुर थापा मगर र सीता थापा मगरले पनि बिद्यालय निर्माणार्थ रु १ लाख ३९ हजार ६०० सहयोग गर्नु भएको थियो।कार्यक्रमको अन्तिममा सहयोगदाताका अभिभावक र सहजकर्तालाई बिद्यालयका प्र.अ., अध्यक्ष र बिद्यार्थीहरुले फूलमाला तथा अबिरले सम्मान गरेका थिए।
