गैर आवासिय नेपाली संघ दक्षिण कोरियाका महासचिव अजय सोडारी बर्खास्त

गैर आवासीय नेपाली संघ (NRNA) राष्ट्रिय समन्वय परिषद्, दक्षिण कोरियाले अजय सोडारी (पूर्ण वहादुर वुढा) लाई महासचिवको जिम्मेवारीबाट तत्काल प्रभावका साथ बर्खास्त गरेको छ। संस्थाले अध्यक्ष विपिन गुरुङको हस्ताक्षर रहेको प्रेस विज्ञप्ति जारी यो विषय जानकारी गराएको हो।

“संघको कार्यसमितिद्वारा २०२५ अक्टोबर १६ मा श्री अजय सोडारी (पूर्ण वहादुर वुढा), महासचिवलाई हाल सामाजिक सञ्जाल तथा विभिन्न माध्यमहरूमा सार्वजनिक रूपमा चर्चित गतिविधि र आरोप–प्रत्यारोपका विषयमा लिखित स्पष्टीकरण माग गरिएको थियो। सो पत्र प्राप्त भएको २४ घण्टाभित्र आवश्यक स्पष्टीकरण पेश गर्न निर्देशन दिइए तापनि तोकिएको समयसीमा भित्र स्पष्टीकरण नआएको कारण उक्त विषय कार्यसमितिको गम्भीर ध्यानाकर्षणमा परेको थियो। ” विज्ञप्तिमा उल्लेख छ।

संघको विधानको धारा १८ (पद रिक्तता र पदपूर्ति) र धारा १४.४ (महासचिवका कर्तव्य र दायित्व) अनुसार पदाधिकारीले पारदर्शिता, जवाफदेहिता र आचारसंहिता पालन गर्नुपर्ने स्पष्ट प्रावधान भए तापनि सोको अवहेलना भएको ठहर गर्दै संघले विधानअनुसारको अनुशासनात्मक प्रक्रिया अघि बढाएको जनाएको छ।