छुसकको कार्यक्रममा एनसिसिको सहजिकरण , तनहूँ, पाँचथर र लुम्बिनीलाई अनुमति
कोरियाको महान चाड छुसकको अवसरमा आयोजना गरिने सांगितिक कार्यक्रमको बाँडफाँड गरिएको छ। जुन १५ तारिख सुवन स्थित भेटघाट सभाहलमा भएको एनसिसिको सहजिकरण कार्यक्रम मार्फत तनहूँ, पाँचथर र लुम्बिनीको निवेदनलाई स्विकृति दिइएको हो ।
तनहूँ समाजले छुसकको पहिलो दिन अक्टोबर ४ तारिखमा सेतिमादि सांगितिक सौगात भाग २ गर्नेछ भने पाँचथर सेवा समाजले अक्टोबर ५ तारिख पाँचथर सांगितिक सौगात भाग २ र लुम्बिनी प्रदेश समाजले लुम्बिनी सांगितिक महोत्सव अक्टोबर ६ तारिख गर्ने गरि सहमति भएको छ।
विगतका वर्षहरुमा संस्थाहरु कार्यक्रम गर्न पाउँ भनी एनसीसीमा निवेदन पेश गर्दथे भने गत सलनाल देखि प्रदेश स्तरीय संस्थाहरुले प्रदेश मातहतको संस्थाबाट कार्यक्रम बाँडफाँड पछि एनसीसीमा सहजिकरणका लागि निवेदन दिने प्रकृया रहेको छ। एनसिसि र प्रदेश स्तरिय संस्थाहरुको पटक पटक बसेको बैठकले ११ बुँदे सहमति पत्र पनि सार्वजनिक गरेको छ।
गण्डकी प्रदेश अन्तर्गत तनहूँले, पूर्वी नेपाल समाजबाट पाँचथरले र लुम्बिनी प्रदेश आफैले कार्यक्रम गर्ने एनसिसी अध्यक्ष हरी खनालले जानकारी गराएका छन्। साथै “एक आपसमा सहयोग, सदभाव र सबै संस्थालाई मिलाएर लैजानु एनसिसिको दायित्व ” रहेको उनले थपे।
