त्रिभुवन एयरपोर्टका प्रहरी,कर्मचारी नै चोर
काठमाडौं-त्रिभुवन अन्तर्राष्ट्रिय विमानस्थलमा कार्यरत दुई प्रहरीले यात्रुको सामान चोरी गरेका छन् । हङकङको ड्रागन एयरबाट कार्गो भई आएको ल्यापटपलगायत सामान चोरी गर्ने प्रहरी जवानद्वय निर्मल शाह र प्रेमप्रसाद जोशी हुन् । उनीहरूले साउन ३ मध्यराति आएको जहाजबाट डेल कम्पनीको ल्यापटप चोरी गरेका थिए ।
कान्तिपुर दैनिकमा प्रतिमा बाँस्कोटा लेख्छिन – राति सवा १२ बजे कार्गोको एप्रोन एरियामा खटिएका उनीहरूले ल्यापटप भएको कार्टुन च्यातिएको देखेपछि त्यहीँबाटै चोरेका थिए । उनीहरूले सामान चोरी गरेको दृष्य सीसीटीभी फुटेजमा देखिएपछि विमानस्थल प्रहरीले नियन्त्रणमा लिएको थियो । उनीहरूविरुद्ध ड्रागन एयरका एयर सर्भिस व्यवस्थापन सुमन तुलाधरले जाहेरी दिएका छन् । अभियुक्त प्रहरी जवानद्वयलाई चोरी मुद्दा लगाई महानगरीय प्रहरी परिसर टेकुको हिरासतमा राखिएको छ ।
विमानस्थलमा चोरी समस्या
विमानस्थलमा यात्रुको सामान चोरी भई नै रहन्छ । तर, प्रहरीबाटै भएको चाहिँ यो पहिलो घटना हो । ‘लोडर वा सरसफाइ गर्नेहरूले त चोरी गरेको भेटिन्थ्यो,’ विमानस्थलका एक प्रहरी अधिकारीले भने, ‘हाम्रै प्रहरीले नै चोरी गरेको घटना पहिलो हो । केही समयअघि इन्डिगो एयरबाट भारतको दिल्लीतर्फ उडेका एक यात्रुको लगेजबाट ३५ हजार भारतीय रुपैयाँ चोरी भएको थियो । त्रिभुवन अन्तर्राष्ट्रिय विमानस्थलमा प्रस्थानद्वारको पहिलो विन्दुदेखि नै मानिस र उनीहरूका गतिविधिको निगरानी हुन्छ । भारतीय विमानबाट जाने सामानहरू नेपाली सुरक्षा निकायबाट पास भएपछि भारतीय सुरक्षा निकायको एक्सरे मेसिनबाट अलग्गै जाँच हुन्छ ।
केही समय अघिसम्म पर्याप्त सीसीटीभी नहुँदा वायुसेवा निगम (आरए) का ‘लोडर’ हरूले एक जनाको शरीरले सीसीटीभी छेल्ने र अर्काले यात्रुको झोला खोतल्ने प्रवृत्ति मौलाएको थियो । एयर इन्डिया, थाई एयरवेजबाहेकका सबै एयरलाइन्सका यात्रुको सामानको जिम्मा आरएका कर्मचारीलाई हुन्छ । विमानस्थलमा यात्रुको सामानलाई लिएर हुने यो लापरबाही नौलो होइन । विमानस्थलको चोरी तथा हराएको उजुरी गर्ने शाखामा महिनाको पाँचदेखि ७ वटासम्म उजुरी पर्छन् । सुटकेसभित्र राखिएका मोबाइल, आइप्याड, बच्चाका खेलौनालगायतका सामग्री चोरी भएको उजुरी आउने गर्छ । कतिपय यात्रुले त यस्ता उजुरी दर्तै गर्दैनन् । ‘उजुरी गरे पनि फिर्ता पाउने आशा नदेखेपछि चोरीको उजुरी नै गर्दैनन्,’ एक कर्मचारीले भने ।
