मकवानपुर म्युजिकल शो–२ मा सुजन चापागाँईको ब्यान्डसँगै प्रिति आले र प्रकाश तितुङको प्रस्तुति हुने
कोरियाको लामो बिदा हुने समय छुसकको दोस्रो दिन मकवानपुर म्युजिकल शो–२ हुने भएको छ । म्युजिकल शोमा चर्चित गायक सुजन चापागाँईको ब्यान्डको प्रस्तुति हुने भएको छ । कार्यक्रममा लोकदोहोरी गायिका प्रिती आले र सेलो गायक प्रकाश तितुङको पनि प्रस्तुति हुनेछ । मकवानपुर सम्पर्क मञ्च, दक्षिण कोरियाले आयोजना गर्ने कार्यक्रम सेप्टेम्बर २९ मा हुनेछ ।
पहिलो पटक नेपालीले खुल्ला ठाउँमा साँगीतिक कार्यक्रम गर्न लागेको आयोजकले बताएका छन् । आठ हजारसम्म दर्शकले कार्यक्रममा सहभागि हुन सक्ने सौलको ‘चिल्डेन ग्रेण्ड पार्क’को खुल्ला स्टेजमा कार्यक्रम गर्ने मकवानपुर कोरिया मञ्चको महासचिव शुभराज भोम्जनले बताए । महासचिव भोम्जनले कार्यक्रम सफल पार्नका लागि लगभग ८ करोड कोरियन वन लाग्ने अनुमान गरे । उनले भने त्यसको लागि सम्पुर्ण मकवानपुरका साथीहरु, एनआरएनए, नेपाली सम्पर्क समिति, बागमती प्रदेश एकता समाज लगायत सबै जिल्लाका संघ–संस्थाहरुले सहयोग गनुपर्ने हुन्छ, र गर्नुहुन्छ भन्ने आशा पनि छ ।’
म्युजिकल शोबाट उठेको फाइदाबाट कोरियामा रहेका नेपालीहरुको लागि मकवानपुरले ‘सेल्टर’ स्थापना गर्ने अध्यक्ष गायक सुर्य रुम्बाले बताए । उनले भने, ‘पहिला–पहिला पनि साँगीतिक कार्यक्रमहरु गर्दै आइरहेको हो, त्यो विगतको त्रृटिहरुलाई सच्याउदै नयाँ ढंगले, नयाँ जोस जंगरका साथ कार्यक्रम सफल पार्न लागेको छौं ।’ कार्यक्रममा सुरक्षाको ब्यबस्थामा कुनै पनि कमिकमजोरी नहुने बताए ।
सुजन चापागगाईको ‘घुमी घुमी…’, ‘लजाएर…’, ‘गाला पुक्क…’ र ‘फुलथुङ्गे रानी…’ जस्ता चर्चित गीतहरु रहेका छन् भने प्रिति आलेको सोल्टी राजाको…., जमाना खराव छ, दोहोरी व्याटल जस्ता चर्चित गीतहरु रहेका छन् । लोक सेलो गायक प्रकाश तितुङका सोनाम ल्होछार, स्याउ स्याउ नाना लगाएतका गीत चर्चित छन् ।
