दक्षिण कोरियाले नेपाललाई दियो असी करोड अनुदान
काठमाडौं – दक्षिण कोरियाले दिगो कृषि विकास तथा समुदायस्तरमा कृषि क्षमता अभिवृद्धि गरी ग्रामीण भेगका बासिन्दाको आय बढाउने समावेशी ग्रामीण विकास परियोजना कार्यान्वयन गर्न करिब रु ८० करोड अनुदानस्वरुप उपलब्ध गराउने भएको छ।
नवलपरासी जिल्लामा कार्यान्वयन गरिने उक्त परियोजनाअन्तर्गत जिल्लाका कुडिया, भुजाहवा, सनाही, तम्सरिया, गुठिपरासनी गाविस र सुनवल नगरपालिकामा कार्यक्रम सञ्चालन हुनेछन्। परियोजना स्थानीय विकास मन्त्रालय र कोरियाली सहयोग नियोग (कोइका)ले कार्यान्वयन गर्नेछन्।
अनुदान सहयोगसम्बन्धी समझदारी पत्रमा शुक्रबार अर्थमन्त्रालयमा अर्थसचिव सुमनप्रसाद शर्मा र नेपालका लागि कोरियाका राजदूत चो योङ जिनले हस्ताक्षर गरे।
त्यस अवसरमा राजदूत चोले भूकम्पपछिको पुनःनिर्माणमा कोरियाली सहायताको प्रतिबद्धता दोहो¥याउँदै दिगो कृषि विकास र आयआर्जनका कार्यक्रम कार्यान्वयन गर्न निरन्तर सहयोग गर्ने बताए।
नेपालको आर्थिक उन्नयनको मेरुदण्डका रुपमा रहेको कृषि क्षेत्रको विकासलाई कोरियाले महत्व दिएको बताउँदै उनले सामाजिक एवम् आर्थिक चुनौती सामना गर्न पनि कृषि उद्यम फलदायी देखिएको उल्लेख गरे।
सचिव शर्माले नेपाल र दक्षिण कोरियाबीच कूटनीतिक सम्बन्ध स्थापना भएयता नेपालको आर्थिक सामाजिक समृद्धिका लागि प्राप्त कोरियाली सहयोगप्रति आभार व्यक्त गरे।
