थेगुमा सम्पन्न खुल्ला भलिबल प्रतियोगिताको उपाधी बागलुङ समाजको पोल्टामा
स्याङ्जा परिवार दक्षिण कोरिया थेगु शाखाको आयोजनामा सम्पन्न दोश्रो खुल्ला मैत्रीपूर्ण भलिबल प्रतियोगिता २०२२ को उपाधी बागलुङ समाज दक्षिण कोरियाले आफ्नो पोल्टामा पारेको छ । थेगु सहरको कुजी खेलमैदानमा भएको उक्त प्रतियोगिताको फाईनलमा नेपाल मगर संघ थेगु शाखा विरुद्ध सोझो सेट (२५/१८, २५/१९) मा अग्रता लिएको बागलुङले नगद पन्ध्र लाख कोरियन वोन सहित आकर्षक ट्रफी, मेडल र प्रमाण पत्र प्राप्त गर्दै विजेता बनेको हो ।
सो प्रतियोगितामा दोश्रो स्थान हासिल गर्न सफल नेपाल मगर संघ थेगु शाखाले दश लाख कोरियन वोन सहित ट्रफी, मेडल र प्रमाण पत्र र प्रतियोगिताभरी उत्कृष्ट खेलाडी घोषित हुँदै नेपाल मगर संघ थेगु शाखाका सेटर हिमशिखर भण्डारीले ट्रफी, प्रमाण पत्र र मेडल सहित एक लाख कोरियन वोन प्राप्त गरे । अन्य विधातर्फको उत्कृष्ट स्पाईकरमा अमृत पौडेल (बागलुङ समाज) र उत्कृष्ट लिबेरोमा गोपाल पुन (नेपाल मगर संघ थेगु शाखा) ले प्रमाण पत्र र मेडल सहित जनही पचास हजार कोरियन वोन सहित पुरस्कृत भए ।
बागलुङ समाजले समाज स्याङ्जा परिवार (हरियो) लाई र नेपाल मगर संघ थेगु शाखाले आन्सङ्ग भलिबल टिमलाई हराउँदै फाईनलमा प्रवेश गरेको थियो । “स्वस्थ जीवनको लागी खेल” भन्ने प्रतियोगिताको नारा सहित कोरियामा रहेका नेपालीहरु विच आत्मियता, भाईचारा र बन्धुत्वको भावना अभिबृद्धि गर्ने उद्धेश्यले आयोजित सो प्रतियोगितामा २१ टिमले सहभागिता भएको र पुरस्कार वितरण कार्यक्रममा स्याङ्जा परिवार दक्षिण कोरिया केन्द्रीय अध्यक्ष विजय थापा प्रमुख अतिथिको रुपमा उपस्थित थिए । प्रतियोगिता सफल पार्न आर्थिक, भौतिक र नैतिक सहयोग गर्ने सम्पूर्णमा आयोजक संस्थाले हार्दिक धन्यवाद व्यक्त गरेको छ ।
