स्याङ्जामा हुने “प्रथम एलादी महोत्सव २०७८” को तयारी अन्तिम चरणमा

बोम्जन गुरुङ

स्याङ्जा जिल्लाको वालिङ नगरपालिका वडा नं. ४ मा पर्ने एलादी गाउँमा प्रथम एलादी महोत्सव २०७८ हुने भएको छ । “धार्मिक तथा साँस्कृतिक सम्पदाको संरक्षण, सम्बर्द्धन, कृषि, हस्तकला साथै ग्रामीण पर्यटनको प्रबर्द्धन” भन्ने महोत्सवको मूल नारा लिएर संगम युवा क्लबको आयोजना तथा स्थानीय आमा समूह र बाबा समूहको विशेष सक्रियतामा यही मंसिर २४ गतेदेखि २८ गतेसम्म ५ दिने सो महोत्सव हुने भएको हो ।

ग्रामीण पर्यटनको प्रचुर सम्भावना बोकेको उक्त एलादी गाउँ र आसपासको क्षेत्रमा महोत्सवले गाउँको आर्थिक, सामाजिक पक्षमा मात्र नभई मौलिक तथा साँस्कृतिक संरक्षण र सम्बर्द्धनमा समेत टेवा पुर्याउने उद्धेश्यले सो महोत्सव आयोजना गरिएको क्लबका अध्यक्ष प्रशान्त गुरुङले बताए ।

उक्त ग्रामीण भेगमा उत्पादित ताजा र अर्गानिक तरकारी, सुन्तला, कफि एवम् अदुवा लगायतको खाध सामाग्रीको प्रदर्शन साथै विक्री वितरणको व्यवस्था गरिएको र पशुपालनबाट आत्मनिर्भर रहेका किसानहरुलाई प्रोत्साहन हुने गरी मासु तथा दूधजन्य पदार्थको विक्रीको साथै महोत्सव मार्फत प्रचारप्रसारको व्यवस्था मिलाईएको मूल आयोजक समितिका प्रतिनिधि कमल गुरुङले जानकारी गराए ।

महोत्सवको लागी आर्थिक सहयोग संकलन अभियान, स्टल निर्माण, प्रचारप्रसार, विभिन्न संघसंस्था, प्रशासन र सम्बन्धित निकायसँग समन्वय गर्दै तयारी अन्तिम चरणमा पुगेको र व्यापारको लागी स्टल बुकिङ्ग खुल्ला भएको आयोजकले जनाएको छ । महोत्सवमा दर्शकको उपस्थितिसँगै थप रौनकता बढाउन सजावट र सरसफाईलाई विशेष ध्यान दिईएको र सो क्षेत्रको धार्मिक, साँस्कृतिक झाँकी, हस्तकला, विभिन्न जातिहरुको भेषभूषा, स्थानीय कृषि उपजको प्रदर्शनी, उपलब्ध श्रोत साधन महोत्सवको मुख्य आकर्षण रहेको आयोजक प्रतिनिधि सुशिल गुरुङले थपे ।

महोत्सवका मुख्य आकर्षणहरु :

१) ख्यातिप्राप्त लोकदोहोरी कलाकारहरुको लाईभ दोहोरी प्रस्तुति
२) घाँटु, कृष्ण चरित्र (मारुनी) जस्ता मौलिक पहिचान बोकेका कलाहरुको विशेष प्रस्तुति
३) ग्रामिण परिवेश र जनजीवन झल्किने परम्परागत हस्तकलाका सामाग्रीको प्रदर्शनी
४) स्थानीय कृषि उपज र वस्तुहरुको प्रदर्शनी
५) प्रथम एलादी Grouping Dance Competition
६) ख्यातीप्राप्त राष्ट्रिय कलाकारहरुको बेजोड प्रस्तुति
७) चर्चित पोख्रेली कोरियोग्राफर समूहको नृत्य प्रस्तुति
८) साविकको वडा स्तरीय पुरुष भलिबल प्रतियोगिता
९) स्थानीय मनोरञ्जनात्मक खेलकुद तथा साँस्कृतिक कार्यक्रम/इलेक्ट्रिक पिङ्ग

सिद्धार्थ राजमार्गको पोखरा-बुटवल अन्तर्गत वालिङ नगरपालिकाको त्रियासी वा रामबाच्छाबाट खहरे, रत्ने हुँदै करिब ७ किलोमिटरको पक्की/कच्ची सडकपछि उक्त महोत्सव स्थलमा पुग्न सकिने र महोत्सव सभ्य र भव्य सम्पन्न गर्न आर्थिक, भौतिक सहयोगको अपेक्षा गर्दै “प्रथम एलादी महोत्सव २०७८” अवलोकनका लागी महोत्सव मूल आयोजक समितिले सम्पूर्णमा अनुरोध गरेको छ ।