एन्टोनियो कसानो धेरै बोलिरहन्छन्, त्यसैले उनले बोलेका हरेक कुरा पत्याउने कि नपत्याउने भन्नेमा शंका हुन्छ । तर पेरिस सेन्ट जर्मेनमा माउरिसियो पोचेटिन्होबारे उनको पछिल्लो टिप्पणीले भने निकै चर्चा बटुलिरहेको छ भने पार्क डेस प्रिन्सेसको डग आउटमा अब जिनेदिन जिदान आउने चर्चा चुलिएको छ ।
गत हप्ता पीएसजी लिग वानमा रेनसँग २–० ले स्तब्ध बन्यो । उक्त परिणामपछि क्लबमा पोचेटिन्होको समर्थन र उनको कामप्रति विश्वास गर्ने धेरै जना नरहेको देखिएको छ । ‘पोचेटिन्होको पीएसजीमा समय निकै कम छ,’ क्रिस्टियन भिएरीको ट्वीचमा रहेको बोबो टिभी च्यानलमा कसानोले भने, ‘मानिसहरुले उनीबारे निकै नराम्रो कुराहरु सुनाएका छन् । मैले निकै नराम्रो हल्लाहरु सुनेको छु ।’
‘उनी निकै राम्रो मानिस हुन्, तर कोच… उनी एक मिनेट पनि रणनीतिक छलफल गर्दैनन् र खेलाडीहरूले पनि यसको माग गरिरहेका हुन्छन् । बरु उनले खेलाडीहरुलाई कसरी खेल्ने भनेर सुझाव मागिरहेका हुन्छन्,’ उनले भने, ‘मैले जे सुने मलाई नै विश्वास लागिरहेको छैन । उनले अहिलेसम्म च्याम्पियनहरूलाई प्रशिक्षण गरेका छैनन् र उनलाई निकै कठिन भइरहेको छ । जहाँसम्म मैले सुनेको छु, यस्तै चल्ने हो भने उनी त्यहाँ धेरै टिक्दैनन् । जिजुमाथि आँखा राखिराख्नु ।’
रियल म्याड्रिड छाडेयता जिदानको नाम युभेन्टस् र फ्रान्ससँग जोडिँदै आएको छ । तर पीएसजी पनि उनको सम्भावित गन्तव्यमा थपिएको छ । रियल पुगेपछि उनी ‘सुपरस्टार’ हरुको अंहकारलाई व्यवस्थापन गर्न सफल भएका थिए भने लस ब्लाङ्कोसलाई लगातार तीनवटा च्याम्पियन्स लिगको उपाधि दिलाउन पनि सफल भएका थिए ।
रियलमा गेराथ बेल, करिम बेन्जेमा र क्रिस्टियानो रोनाल्डो थिए भने पीएसजीमा अहिले किलियान एम्बाप्पे, नेयमार र लियोनेल मेस्सी छन् जसको व्यवस्थापन पोचेटिन्होले गर्न सकिरहेका छैनन् । यदि पीएसजीलाई सुपरस्टारहरुको व्यवस्थापन गर्ने कोही व्यक्ति चाहिएको हो भने त्यसका लागि जिदान सही व्यक्ति हुनसक्छन् ।
