स्याङ्जा परिवार थेगु शाखाको वार्षिक साधारण सभा सम्पन्न
बोम्जन गुरुङ, दक्षिण कोरिया ।
कोरियास्थित अति सक्रिय क्षेत्रीय संस्था स्याङ्जा परिवार थेगु शाखाको आइतबार वार्षिक साधारण सभा सम्पन्न भएको छ । संस्थाको प्रचलित विधान अनुरुप थेगु स्थित बालाजी रेस्टुरेण्टको सभा हलमा उक्त कार्यक्रम सम्पन्न भएको हो ।
संस्थाका अध्यक्ष विष्णु वाग्लेको सभापतित्वमा सम्पन्न उक्त कार्यक्रम बरिष्ठ उपाध्यक्ष श्री मित्र मगरको स्वागत मन्तव्यसँगै शुरु भएको थियो । संस्थाका सचिव शरण न्यौपानेले दोश्रो कार्यसमिति गठन भएपछिको प्रत्येक गतिविधिलाई विस्तारित रुपमा प्रस्तुत गर्दै वार्षिक प्रतिवेदन र कोषाध्यक्ष मिलन रानाले आर्थिक प्रतिवेदन प्रस्तुत गरेका थिए ।
कार्यक्रमका प्रमुख अतिथि स्याङ्जा परिवार दक्षिण कोरिया केन्द्रीय अध्यक्ष युवराज गुरुङले अहिलेको कोरोना महामारीमा सबैलाई संयमित र सुरक्षित रहन आग्रह गर्दै स्याङ्जा परिवारको अभिन्न अंग थेगु शाखाले अति राम्रो गतिविधिका सहित अघि बढिरहेको र यस शाखाले संस्थाको निष्ठामा ईट्टा थप्ने काम गरिरहेको सन्दर्भमा खुशी व्यक्त गर्दै थेगु शाखाको उन्नति र हरेक कार्यमा आफ्नो व्यक्तिगत र केन्द्रीय समिति सहयोगको लागि सदा तत्पर रहेको धारणा व्यक्त गरेका थिए ।
थेगु शाखाका प्रमुख सल्लाहकार श्री रमेश रानाले कोरोनाको कारण समय प्रतिकूल भइरहेको सन्दर्भमा जूनसुकै संघ संस्थाले अपेक्षा अनुसारको कार्य गर्न नसकेपनि संस्थाको मर्म र भावना अनुसार स्याङ्जालीहरुलाई एक सुत्रमा बाँधेर केन्द्रीय र शाखाको सम्बन्ध अझै बलियो हुनुपर्नेमा जोड दिएका थिए । थेगु शाखाका निवर्तमान अध्यक्ष तथा वर्तमान सल्लाहकार बीरेन्द्र नौभाग्यले हरेक संस्था स्याङ्जालीहरुको एउटा कुशल अभिभावक बन्नुपर्ने र संस्थागत मजबुतीका लागी एकता अपरिहार्य रहेको धारणा व्यक्त गरे ।
परदेशमा आईपर्ने दुःख र अप्ठ्यारो परिस्थितिलाई मध्यनजर गर्दै थेगुमा स्याङ्जा परिवार थेगु शाखाद्धारा सञ्चालित “स्याङ्जा घर सेल्टर” सञ्चालनमा आईसकेको र यसको स्थापनामा आर्थिक, नैतिक र भौतिक सहयोग गर्ने तमाम सहयोगी नेपाली दाजुभाई, दिदीबहिनी र महानुभावहरुलाई स-सम्मान स्मरण गर्दै थेगु शाखाका अध्यक्ष विष्णु वाग्लेले कार्यक्रममा उपस्थित संस्था सम्बद्ध सबैलाई धन्यवाद व्यक्त गरेका थिए भने कार्यक्रमको सञ्चालन सचिव शरण न्यौपानेले गरेका थिए ।
