सउलका सार्वजनिक सौचालयमा गुप्त क्यामराको आतंक, क्यामरा खोज्दै सरकारी अधिकारी
पछिल्लो समय दक्षिण कोरियामा सार्वजनिक सौचालय तथा कपडा फेर्ने स्थानमा गुप्त क्यामराहरु लुकाएर राख्ने र त्यसबाट अश्लील भिडियो बनाउने घटना गम्भीर समस्याको रुपमा देखा परेको छ ।
गत बर्ष मात्र यसरी गुप्त क्यामराबाट खिचेका भिडियोहरुबारे ६ हजार भन्दा बढीको मुद्दा परेको यहाँको समाचार एजेन्सी योनहपले जनाएको छ । विशेष गरि राजधानी सउलका सार्वजनिक सौचालयमा लुकाएर राखेको क्यामराले खिचेका यस्ता भिडियो सम्बन्धित ब्यक्तिले थाहै नपाई विभिन्न अश्लील साइटहरुमा राख्ने गरेको पाइएको छ । जस्ले सम्बन्धित ब्यक्तिको चरीत्र हत्या हुन गएकोले यस्तो कार्यलाई रोक्न राजधानी सउलको सबै सार्वजनिक सौचालयमा सरकारी अधिकारीहरुले अनुगमनको सुरुवात गरेको छ ।
गत अगस्तको पहिलो साता हजारौं महिलाहरुले ूमेरो जीवन तिम्रो अश्लीलता होइनू भन्दै सउलको सडकमा प्रदर्शन समेत गरेका थिए ।
एजेन्सीका अनुसार अहिले सउलको करिब २० हजार सार्वजनिक सौचालयको निरीक्षण गर्न जम्मा ५० जना अधिकारी खटाएको छ । सरकारी नयाँ योजना अनुसार अब सार्वजनिक सौचालयमा कार्यरत तथा मर्मत सम्भारमा खटिने ८ हजार कर्मचारीले पनि दैनिक यस्तो क्यामराको निगरानी गरिने जनाएको छ । यसो गर्दा प्रत्येक कर्मचारीले करिब ३ वटा सार्वजनिक सौचालयको दैनिक निगरानी राख्न सकिने छ । योनहपलाई सरकारी अधिकारीले दिएको जानकारी अनुसार २० हजार सौचालय मध्ये यस्तो घटना धेरै हुने करिब एक हजार सौचालयमा विशेष निगरानी राखिने छ ।
प्रहरीलाई भने यस्तो घटनामा संलग्न अपराधीलाई समात्न धेरै अप्ठ्यारो परेको जनाएको छ । जसको मुख्य कारण सामाजिक संजाल र स्मार्ट फोनको व्यापक प्रयोगलाई लिएको छ । त्यस्तै अपराधीहरुले गुप्त क्यामरा राखेको १५ मिनेट भित्र फेरि झिकेर लगिसक्ने भएकाले पनि अपराधी पत्ता लगाउन गाह्रो परेको छ । प्रहरीका अनुसार गुप्त क्यामरालाई कडा निगरानी गरेता पनि ९० प्रतिशत अश्लील भिडियोहरु नियमित प्रयोग गर्दै आएका स्मार्ट फोनबाट बनाएको पाइएको छ ।
गत बर्ष यस्तो घटनामा संलग्न आरोपमा करिब ५ हजार चार सय जनालाई प्रहरीले पक्राउ गरेको तर यस मध्ये जम्मा २ प्रतिशतलाई मात्र जेल चलान गरेका थिए । तर महिला अधिकारकर्मीहरुले भने यस्तो घटनामा संलग्नलाई कडा भन्दा कडा कार्वाही गर्न सम्बन्धित निकायलाई दबाब दिदै आएको छ । -एजेन्सी
