लाओती सयङ दक्षिण कोरिया गठन
रोजगारीको सिलशिलामा कोरियामा रहेका लाओतीहरुको एक भेलाले पापोहाङ लाओती सयङ दक्षिण कोरिया गठन गरेको छ । गत फागुन चार गते कोरियाको राजधानी सउल स्थित नाङ्लो रेष्टुरेन्टको सभाहलमा आयोजित भेलाले सयङ गठन गरेको हो। उक्त भेलामा सयङ गठनको औचित्यबारे बोल्दै सयङका संरक्षक हुकुम लाओतीले पारिवारिक सद्भाव, मेलमिलाप र परदेशमा लाओती बन्धुहरु माथि आईपर्न सक्ने बिबिध समस्याहरुको समाधान गर्नको लागि सयङ गठन गरिएको बताउनु भयो।
उक्त भेलाले सर्वसम्मतबाट अध्यक्षमा रमेश लाओती,उपाध्यक्ष द्वय मन्जु लाओती,राम कुमार लाओती, सचिव ईन्द्रजीत लाओती, सह सचिव जेनिस लावती, कोषाध्यक्ष केहेरमान लाओती, सह कोषाध्यक्ष हेमकला खापुङ लाओती र आठ जना सक्रिय सदस्य सहित पन्ध्र जनाको कार्य समिति गठन गरेको छ। सभामा बोल्दै नव निर्वाचित अध्यक्ष रमेश लाओतीले विश्वमा छरिएर रहेका लाओतीहरुमा पारिवारीक एकता र सहकार्यका साथै भाषा,संस्कृति र परम्पराको संरक्षण र संबर्धन गर्दै कोरियामा आकस्मिक भैपरि आउने आपत विपत र समस्याहरुको समाधानमा सहयोग पुर्याउने लाओती सयङ कोरियाको मूख्य उद्देश्य रहेको बताउनु भयो। साथै उहाँले सयङ एउटा विशुद्द पारिवारिक संगठन भएकोले यसमा कुनै पनि जातिय,धार्मिक र राजनितीक गन्ध आउन नहुने र त्यस्तो नजरले नहेरी दिन पनि अनुरोध गर्नु भयो। भेला पश्चात रमेश लाओतीको अध्यक्षतामा बसेको प्रथम बैठकले कोरियामा रहेका बाँकी सम्पूर्ण लाओती बन्धुहरु स्वत साधारण सदस्य रहने र प्रत्येक सदस्यहरुबाट मासिक रुपमा लेभि उठाउने निर्णय गरेको छ।
लेभि बापत संकलन भएको रकम कोरियामा रहेर रोजगारी गरिरहेका लाओतीहरु कुनै दुर्घटनामा परेमा,बिरामी वा अन्य कुनै समस्यामा परेमा उनीहरुलाई राहत स्वरुप प्रदान गर्ने निर्णय गरेको छ। सो बैठकले राम लाओती, हुकुम लाओतीलाई सयङको संरक्षक साथै बिष्णु लाओती,पूर्ण बहादुर लाओती र डिल्ली लाओतीलाई सयङको सल्लाहकारमा मनोनित गरेको छ।
उक्त कार्यक्रम किराँत याक्थुङ चुम्लुङ दक्षिण कोरियाका अध्यक्ष सुन्दरदीप आङ्देम्बेको प्रमूख आतिथ्य तथा राम लाओतीको संयोजकत्वमा सम्पन्न भएको थियो। कार्यक्रममा कियाचु कोरियाका बरिष्ठ उपाध्यक्ष अग्नि पन्धाक, संचारकर्मी डम्बर सुब्बा र कोरियामा रहेका करिब एक सय जना लाओतीहरुको उपस्थिती रहेको थियो।
