तिहारको तीन रङ्ग
गाउँको रङ्ग
शहरको रङ्ग
प्रवासको रङ्ग
माटोको निधारमा
आँशुसित मुछेर
यसरी,
तिहारको सप्तरङ्गी टीकाको
तीन रङ्ग लगाईएछ !
गाउँको रङ्गभित्र
जोर मादल,
छिङ्छिङ् चुरा बजाउँदै घन्कन्छ,
हलुका नशा चढेका चिसो बत्तासले
मीठो लयमा झ्याउरे गीत गाउँछ !
बाँसुरी,
देउसी, भैलो भट्टयाउँछ !
पाउजु, खैजडीका नाङ्गा खुट्टाहरु,
आँगनमा गोलबद्ध हुन्छन्
देउसी रे ! भन्छन्
खुशीले बुरुक्क–बुरुक्क उफ्रदै
अङ्गालो हालेर नाच्छन् !
नाङ्लोभरि सेलरोटी, फलफूलहरु
दक्षिणा चामलमाथि दियो बालेर
मीठो मुस्कान दैलो उघारेर निस्कन्छ !
रङ्गीबिरङ्गी फूलमालाहरु
कम्मर मर्काएर नाच्छन्
अफसोच,
यि दृश्य हेर्ने
आँखाहरुले गाउँ छाड्छन्
शहरको बाटो समाउँछन्
विदा हुन्छन्
हात हल्लाउछन् ।
शहरको रङ्गभित्र
गल्ली–गल्लीले गिटार बजाउँछन्
चोक–चोकले ड्रमसेट ठोक्छन्
मादल, बाँसुरी र खैजडीहरु
गुन्यु–चोली र दौरा–सुरुवालहरु
मिनी बसले अगाडीपट्टि
ब्यानर टाँगेर बोक्छन् !
कार, मोटरसाईकलहरु
ढाकाटोपी, टाई, सुटहरु
घर कम्पाउण्डको गेट खोल्दै
मुस्कानसहित नमस्कार ठोक्छन्
करेण्टको प्लग जोड्छन्
एम्प्लीफायर घन्कन्छ
देउसी रे ! भन्छन्
रङ्गीबिरङ्गी फूलमालाहरु
कम्मर मर्काएर नाच्छन्
अफसोच,
यि दृश्य हेर्ने
आँखाहरुले शहर छाड्छन्
प्रवासको बाटो समाउँछन्
विदा हुन्छन्
हात हल्लाउछन् ।
प्रवासको रङ्गभित्र
मेशिनले एकोहोरो देउसी भट्टयाए जस्तो
मनले मनमनै देउसी रे ! भने जस्तो
तिहार आए, आए जस्तो
तिहार गए, गए जस्तो
सामाजिक सञ्जालमा
मेसेन्जर खोल्यो, हे¥यो
वाईफाई खोल्नसाथ
लट्टेजस्तै पटटङ पड्कन्छ नोटिफिकेशन्
तिहारको अनेककानेक
शुभ–कामना गीतहरु
अनेककानेक देउसी–भैलोहरु
इनबक्समै देउसी–भैलो
इनबक्समै भाइटीका !
त्यसै–त्यसै,
सम्झनामा फेरि
रङ्गीबिरङ्गी फूलमालाहरु
कम्मर मर्काएर नाच्छन्
आँखाको आँगन ढिकमा
घैलाबाट पानी पोखिन्छ
अफसोच,
यि दृश्य हेर्ने
आँखाहरुले हेर्न छाड्छन्
निद्राको बाटो समाउँछन्
विदा हुन्छन्
हात हल्लाउछन् ।
दिनभरिको कामले
थकित आँखाहरु
फुस्स निदाउँछन् !
यसरी,
तिहारको सप्तरङ्गी टीकाको
तीन रङ्ग लगाईएछ
अब, बाँकी रङ्ग ?
