हुण्डीबाट रेमिट्यान्स नपठाउन राष्ट्र बैंकको आग्रह

फोनिज कोरिया संवाददाता

काठमाडौ – हुण्डीमार्फत रेमिट्यान्स नपठाउन कामदार वर्गमा राष्ट्र बैंकले आग्रह गरेको छ। हुन्डीमार्फत रकम पठाउँदा विदेशी मुद्राको सञ्चितीमा कमी आउने भएको भन्दै राष्ट्र बैंकले सो अनुरोध गरेको हो। हुन्डीबाट रकम पठाउँदा गैरकानुनी बाटोको अवलम्बन गरिएको ठहर हुने र विदेशी मुद्रा सञ्चितीमा कमी आउने भएकाले वित्तीय संस्थामार्फत रकम पठाइदिन नेपाल राष्ट्र बैंकका प्रवक्ता मीनबहादुर श्रेष्ठले सबैलाई आग्रह गरे।
मिडिया इन्टरनेसनलले आज राजधानीमा आयोजना गरेको ‘भूकम्पपछिको विप्रेषण’ विषयक अन्तरक्र्रिया कार्यक्रममा श्रेष्ठले विदेशी मुद्राको सञ्चितीको मुख्य आधार वैदेशिक रोजगारबाट प्राप्त मुद्रा नै भएकाले गलत बाटो अवलम्बन नगर्न अनुरोध गरे।
पहिले पहिले वैदेशिक रोजगारमा जाने अधिकांश कामदारले विदेशबाट रकम पठाउँदा हुन्डीमार्फत पठाउने चलन थियो । हुन्डीमार्फत रकम पठाउँदा नगद प्राप्त गर्ने व्यक्तिको निवासमा नै रकम पु¥याइन्थ्यो तर हिजोआज विप्रेषण रकम वितरण गर्ने कमर्सियल बैंक, वित्तीय संस्था तथा कम्पनीमा धाउनुपर्ने प्रचलन छ ।
विप्रेषण रकम वितरणमा काम गर्दै आएको आइएमई कम्पनीका प्रतिनिधि सुमन पोखरेलले अझै १० प्रतिशत कामदारले हुन्डीमार्फत रकम पठाउने गरेको र त्यो वर्गलाई निरुत्साहित गर्न सरकारले कामदार वर्गलाई सचेत गर्नुपर्ने राय व्यक्त गरे।
भूकम्पपछि लगातार गइरहेका परकम्पका कारण मुलुकको १४ जिल्लालाई क्षतविक्षत पारेको छ । सो क्षेत्रको पुनःनिर्माणका लागि विप्रेषण रकम सरल तरिकाले प्राप्त होस् भन्ने उद्देश्यले सरकारले विशेष छुटको व्यवस्था गरेका कारण विप्रेषण रकममा वृद्धि भएको अर्थमन्त्रालयका सहसचिव मधुसूदन पौडेलले जानकारी दिए।
चालु नौ महिनामा चार खर्ब २५ अर्ब विप्रेषणबापत प्राप्त भइसकेको छ । सो रकम गत वर्षको तुलनामा सात प्रतिशतले बढी हो । “विप्रेषण वढ्नुमा रोजगारदाता कम्पनीले नेपाली कामदारलाई पेस्की रकम दिनु र कामदारले सञ्चिती गरेको रकम पुनःनिर्माणका लागि तत्काल पठाउनु मुख्य कारण हो” बैंकर्स देवीप्रकाश भट्टचनले भने।
गत महिना रु ४४ अर्ब विप्रेषण प्राप्त भएको थियो । तर यो महिना रु ४७ अर्ब विप्रेषण प्राप्त भइसकेको छ । राष्ट्र बैंकका प्रवक्ता श्रेष्ठले प्राप्त विप्रेषण रकमको ७९ प्रतिशत अनुत्पादक क्षेत्रमा खर्च हुनु दुर्भाग्यपूर्ण भएको जानकारी दिए।