कोरिया र मध्यपूर्वबाट आएकालाई स्वास्थ्य परीक्षण गर्न आग्रह
फोनिज कोरिया संवाददाता
काठमाडौं-सरकारले दक्षिण कोरिया, साउदी अरेबिया तथा मध्य पूर्वका देशबाट आएका व्यक्तिमा ज्वरो, रुघाखोकी तथा निमोनियाको लक्षण देखा परे तत्काल स्वास्थ्य परीक्षण गराउन अनुरोध गरेको छ ।
यस्ता लक्षण मर्स भाइरसको संक्रमणले देखिने भएकाले ती देशबाट आएका नागरिकले उच्च सतर्कता अपनाउन स्वास्थ्य तथा जनसंख्या मन्त्रालयले अनुरोध गरेको हो । साथै रोगको लक्षण देखिएमा परिवार र समुदायमा घुलमिल नगरी छुट्टै कोठामा बस्न समेत अनुरोध गरिएको छ ।
यस्तै मध्य पूर्वका देश र दक्षिण कोरिया भ्रमण गर्नु पहिले चिकित्सकको सल्लाह लिएर मात्रै जान पनि सुझाव दिइएको छ भने ती देशमा भ्रमण गर्दा काँचो दूध र नपाकेको मासु नखान तथा चमेरा र उँटलाई नछुन पनि सचेत गराइएको छ ।
उँट र चमेराबाट मानिसमा सरेको मर्स भाइरसका कारण अहिले सम्म ४ सय ४४ जनाको ज्यान गएको छ भने १२ सयभन्दा बढी बिरामी भएका छन् । पछिल्लो समय दक्षिण कोरियामा पनि मर्स भाइरसका कारण ६ जनाको ज्यान गएको छ ।
