सोल, रजतपटमा सर्वाधिक कमाइ गर्न सफल चलचित्र छक्का पन्जा सोलमा पनि प्रदर्शन गरिने भएको छ । प्रदर्शनको ५१ औ दिन मनाइसकेको छक्का पन्जालाई राप्ती समाज दक्षिण कोरियाले प्रदर्शन गर्न लागेको हो । राप्ती समाज दक्षिण कोरियाले “राप्ती घर ” को निरन्तर सञ्चालन र ब्यबस्थापन कार्यको लागि नोभेम्बर 13 मा छक्का पन्जा प्रदर्शन गर्न लागिएको हो ।
कलिवुडको सफल नेपाली चलचित्र ” छक्का पन्जा” प्रदर्शनको तयारी पूरा भएको समाजले जनाएको छ । नेपालमा २४ मल्टीप्लेक्स हलहरुमा ५१ दिन पार गरेको चलचित्र “छक्का पन्जा” नोभेम्बर 13 आइतबर जोग्यसा गुम्बा हलमा प्रदर्शन गर्न लागिएको हो ।
चलचित्र हेरी मनोरञ्जन लिन र राप्ती समाजले गर्दै गरेको सामाजिक कार्यमा सहयोग गर्नुहुन कोरियाबासी नेपालीहरुलाई समाजले अनुरोध गरेको छ । देश विदेशमा सफल छक्का पन्जा हेर्नका लागि सबै नेपाली हरुको हात-हातमा टिकट पुर्याउने सक्दो प्रयास आफूहरुले गरेको समाजका महासचिव यज्ञमुर्ति पोख्रेलले स्पष्ट पारे ।
समाजका अनुसार फेन्थेकको आरती रेस्टुरेन्ट, सुवनको नारायणी प्यालेस, आन्सानको हिमालयन, सिस् महल र कान्तिपुर रेस्टुरेन्ट तथा तुङ्देमुनमा एभरेस्ट करी फुड र पूजा लक्ष्मी रेस्टुरेन्टबाट पनि टिकट लिन सकिने छ । १५ करोड बढी व्यापार गर्न सफल चलचित्र छक्का पन्जा हेर्नका लागि सोल मेट्रो लाइन एकको छोंग्गाक स्टेसन दुइ नम्बर गेटबाट बाहिरिएर दुइ सय मिटरको दुरीमा रहेको जोग्यसा गुम्बा प्रदर्शन हलमा पुग्न सकिनेछ ।