कोरियाबाट सांगीतिक “सहयात्रा”को आरम्भ
सउल
दक्षिण कोरियामा कडा परिश्रम र व्यस्त समयका बाबजुद पनि साहित्य सिर्जनामा तल्लीन युवा वर्गहरु सांगीतिक सहयात्रामा निस्केका छन् । आ आफ्ना सिर्जनालाई संगीतिक मालामा उनेर बनाएका एल्बममार्फत प्रदेशबाट संगीतिक यात्रा आरम्भ गरेका हुन् । जसको न्वारन गर्दै “सहयात्रा” नै नाम जुराएका छन् । कोरियामा पहिलो सन्तानको रुपमा जन्मेका एल्बम सहयात्राको घुम्टो उघारने काम आइतबार सउलमा सम्पन्न भएको छ ।
नेपाली साहित्य समाज (नेसस) दक्षिण कोरियाले एक पर्षे गर्भधारण पछि “सहयात्रा”लाई जन्म दिएका हुन् । कोरियामा प्रवासी कामदारको रुपमा भित्रिएका साहित्यीक सर्जकहरुको सिर्जनालाई नेससले गोलबद्ध गर्दै ऐतिहासिक कृतीको रुपमा सांगीतिक यात्राको थालनी गरेका छन् । यस सहयात्रामा कोरियामा रहेका १५ युवा युवतीको गीतलाई समेटिएको छ । जसमा कल्पना धर्ती , यल्जी विवश , सायद कुष्ण राई, गंगा पौडेल , शकुन आँशु , खगेन्द्र पराजुली , सुशिल राज रेग्मी, गणेश पौडेल, मिलन किराती , पुर्वेली गाँउले , चन्द्र लामा अनुराग, मणि भूषाल, सुरेन्द्र कार्की, फणिन्द्र भण्डारी अर्पण र विनोद बान्तवा रहेका शब्द रहेका छन् ।
त्यस्तै कोरिया मै रहेका संगीतकार डि आर अटुले एल्बममा समेटिएका १५ गीतमध्ये पाँच गीतमा संगीत भरेका छन् । त्यस्तै एल्बमका तीन गीतमा रोविन रेगनको संगीत र स्वर सुन्न पाइन्छ भने एउटा गीतमा राजेन्द्र परियारको संगीत र स्वर रहेका छन् । बाँकी गीतमा संगीतकार राजकुमार बगर, मनोज साइ्सोन , बालान्द राई , राजेन्द्र बजगाई र राजसुक लिम्बुले संगीत भरेका छन् । एल्बममा समेटीएका गीतहरुमा लोकप्रीय स्वर गायीका अञ्जु पन्तदेखि गायक राजेश पायल राई, शिब परियार, प्रमोद खरेल, स्वरुपराज आचार्य, मिलन अमात्य, मेलिना राई , राज सिग्देल, सिडी विजय अधिकारी, सागर संसार राई र नमता राईको आवाज सजिएको छ ।
घुम्टो उघारने कार्यक्रममा यल्जी विवशको शब्द डि आर अटुको संगीत र मेलिना राईको स्वर रहेको काडाले घोच्ला विस्तारै जाउ बोलको गीतको म्युजिक भिडियो पनि सार्वजनिक गरिएको थियो । कर्यक्रममा प्रमुख अतिथि कोरियन कवि किमह्योइ० ह्योलगायत अन्य अतिथि र सबै सर्जकहरुले संयुक्तरुपमा एल्बमको घुम्टो उघारने कार्य गरेका थिए । आफ्नो पहिलो सन्तानको रुपमा जन्म दिएका संगीतिक एल्बम सहयात्राको विक्री वितरणको जिम्मा समेत लिएका नेससले विक्रीबाट प्राप्त रकम मध्ये ६० प्रतिशत नेपालमा अनाथलाय भवन निमाणार्थ सहयोग गरिने र बाँकी साहित्य क्षेत्रमा लगाउने घोषणा गरे ।
कार्यक्रममा एल्बममा उनिएका गीतका मुखडालाई गीतकारहरु कसैले संगीति लयमा त कसैले गद्य शैलीमा प्रस्तुत गरेका थिए । त्यस्तै सांगीतिक सर्जकहरुको उपस्थिती रहेको कार्यक्रमलाई गजल, कविता र संगीत प्रस्तुत गर्दै सांगीतमय बनाएका थिए ।