ग्याङसाङनाम्दो विश्व दिवसमा भूकम्प पिडितका लागि राहत संकलन
फोनिजकोरिया सम्वाददाता
छाङवन, ग्याङसाङनाम्दो र छाङवन विदेशी मजदूर तथा परामर्श सेवा केन्द्रले हरेक वर्ष आयोजना गर्दै आएको ग्याङसाङनाम्दो विश्व दिवसको अवसरमा आइतबार दक्षिण कोरियाको छाङवनस्थित प्रोभिनल अडिटोरियम आउटडोर प्लाजामा विभिन्न कार्यक्रमका साथ सम्पन्न भएको छ ।
विभिन्न मुलुकको सहभागिता रहेको कार्यक्रममा नेपाल, भियतनाम, फिलिपिन, कम्बोडिया, पाकिस्तान, श्रीलंका, बंगलादेश, उजवेकिस्तान, चीनलगायतका दश मुलुकका खानाका स्टलसमेत राखिएको थियो । विहान ११ बजे सुरु भएको कार्यक्रममा कोरियाको परम्परागत बाजा, बेली नृत्यका साथै केपप सहित कोरियन गायकगायिकाहरुले गीत तथा आर्कषक नृत्यहरु प्रस्तुत गरेका थिए ।
निशुल्क स्वास्थ्य परिक्षण, फेस पेन्टिङ, नेलआर्ट, हेयर कटिङ तथा विभिन्न परामर्शका स्टलहरु समेत राखिएको कार्यक्रममा विदेशीबिच गायनप्रतियोगिता समेत भएकोले अन्य मुलुकका सहभागी कलाकारहरुले कोरियन भाषा र आआपनो भाषाका गीतहरु प्रस्तुत गरेका थिए ।
त्यस्तै विदेशी कामदार तथा विदेशी कामदारलाई राम्रो गर्ने कम्पनीहरुलाई समेत सम्मान गरिएको थियो । जसमध्ये राम्रो काम गर्ने विदेशी मजदूर मध्ये नेपाली कामदार नारायण पौडेल सम्मानित भएका थिए । उनले कम्पनीमा राम्रो काम गर्नुका साथै बिदाको दिन समेत स्वयंसेवकको रुपमा खट्दै आएका थिए ।
गायनप्रतियोगिता पहिलो, दोसा्रे र तेस्रो हुनेलाई नगद एवं चिठ्ठाबाट पहिलो दोस्रो र तेस्रो हुनेलाई साइकल र अन्य आकर्षक पुरस्कारहरु प्रदान गरिएको थियो । कामदार, विद्यार्थी तथा विवाह गरेर आएका थुप्रै विदेशी युवायुवतीहरुको उपस्थिति रहेको कार्यक्रममा नेपालीहरुको सहभागिता भने कमै देखिन्थ्यो ।
‘नेपालमा गएको विनासकारी भूकम्पले देश शोकमा डुबेको बेला यस्तो कार्यक्रममा सहभागिता हुन पनि मन थिएन त्यसैले धेरै प्रचारप्रसार पनि नगरेको’, छाङवन विदेशी मजदूर तथा परामर्श सेवा केन्द्रमा कार्यरत स्नेहा लामाले फोनिजकोरियासँंग भनिन् । ‘नेपालीहरुलाई पिडा पर्दा हामी विदेशमा हुनेहरु कहाँ रमाउन सक्छौं र’ सँंगै रहेकी गंगा खतिवडाले थपिन् ।
हुन पनि हो यो पटकको महोत्सवमा झण्डै ८० जनाको सहभागी रहे पनि हरेक नेपालीको मुहारमा त्यति खुशी देखिदैन थियो । कार्यक्रमको मजा लिन भन्दा बरु भूकम्प पिडितको लागि थोरै सहयोग जुटाउन सकिन्छ कि भनेर राहत संकलनमा व्यस्त देखिन्थे नेपालीहरु । उक्त दिन ११ लाख ९४ हजार ९ सय वन संकलन भएको थियो ।
