ली मिन हो र आइ युले पनि १-१ करोड सहयोग गरे
फोनिज कोरिया संवाददाता
सोल-गत बैशाख १२ गते गएको भूकम्पबाट पिडित नेपाली बालबालिका सहयोग अभियानको सिलसिलालाई कोरियन कलाकारहरुले पनि जोडेका छन् । नायक ली मीन होले नेपालको भूकम्प पिडित बालबालिकाहरुलाई युनिसेफ कोरियामार्फत करिब १ करोड रुपैयाँ सहयोग गरेका छन् । मंगलबार उनले आफ्नो ग्लोबल फेन क्लब ”मिनोज” को नामबाट सो रकम जम्मा गरेका हुन् । सुपरस्टार नायक मानिने हो कोरियाकै महँगा कलाकारमा गनिन्छन । उनले अभिनय गरेको ‘कोछ बोदा नाम्जा’ एशियामा चर्चित छ ।
त्यस्तै गायिका तथा नायिका आ इ युले पनि भूकम्प पीडित बालबालिकालाई १ करोड रुपैया प्रदान गरेकी छिन् । उनले ग्लोबल चिल्ड्रेन फाउन्डेसनमा सो रकम सोमबार जम्मा गरेकी हुन् । लो एन ट्री इन्टरटेनमेन्टसंग संलग्न रहेकी २२ बर्षीय इ नेपाली बालबालिकालाई धेरै सहयोग गर्ने कान्छी कोरियन सेलिब्रेटी हुन् । त्यस्तै पूर्ब मिस कोरिया तथा अभिनेत्री कीन सङ र्यङले १० लाख रुपैयाँ सहयोग गरेकी छिन् । उनि प्लान इन्टरनेसनल सद्भावना दूत हुन् । कोरियाकै चचिर्त आइडल ग्रुप ‘गल्स डे’ ले पनि १० लाख रुपैयाँ सहयोग गरेको छ ।