भूकम्पका कारण ईपीएस परीक्षा सर्ने
फोनिज कोरिया संवाददाता
काठमान्डौ-भूकम्पका कारण दक्षिण कोरियामा काम गर्न जान अनिवार्यरुपमा दिनुपर्ने ईपीएस भाषा परीक्षा सर्ने भएको छ ।
पूर्वनिर्धारित तालिकाभन्दा दुई सातादेखि एक महिनासम्म परीक्षा मिति सार्न लागिएको अन्नपूर्ण पोस्टमा खबर छ ।
परीक्षा सञ्चालन हुने मिति भने अझै निर्धारण गर्न बाँकी छ । यसअघि आगामी जेठ ३० र ३१ ग्ते भाषा परीक्षा सञ्चालन गर्ने तयारी गरिएको थियो । ईपीएस कोरिया शाखा प्रमुख डिल्ली बास्तोलाले भूकम्पका कारण परीक्षा सार्नुपर्ने अवस्था आएको जानकारी दिए । ‘पूर्व निर्धारित तालिकाभन्दा कम्तिमा दुई सातादेखि एक महिनासम्मका लागि परीक्षा सर्नेछ,’ उनले भने । मिति भने पछि तय गरिने उनले जानकारी दिए ।
भाषा परीक्षामा सामेल हुन ५१ हजार तीन सय जनाले आवेदन फारम भरेका छन् । त्रिभुवन विश्वविद्यालय, उच्चमाध्यमिक शिक्षा परिषद्बाट लिइने परीक्षा पनि यसै समयमा पर्ने भएकाले सरोकारवालासँग समन्वय गरेर परीक्षा मिति तय गरिने उनले बताए ।
