भूकम्पपिडितको सहयोगार्थ कोरियामा रेशम फिलिलि प्रर्दशित
फोनिज कोरिया सम्वाददाता
थेगु, नेपालमा गएको महाभूकम्पबाट पिडितहरुको सहयोगार्थ ओखलढुंगा समाज सेवा दक्षिण कोरियाले आइतबार थेगु शहरमा नेपाली कथानक चलचित्र ‘रेशम फिलिलि’ प्रदर्शन गरेको छ । ओखलढुंगा समाज सेवाले आयोजना गरेको चलचित्र रेशम फिलिलिबाट उठेको रकम सोमबार ‘राहत कोष’मा जम्मा गर्ने समाजका अध्यक्ष मानसिंह गुरुङले बताएका छन् । उनका अनुसार हल भाडा र टिकट खर्च कटाएर बचेको रकम १६ लाख ६६ हजार ६६ कोरियन वन राहत कोषका लागि छुट्याइएको छ ।
चलचित्र हेर्न दर्शकको उपस्थिति बाग्लै रहेको थियो । झण्डै सभा तीनसयको हाराहारीमा उपस्थित भएका दर्शकले भूकम्पको पिँडा भुलेर केही समय भएपनि मनोरञ्जन लिएका थिए । ‘यस्तो अवस्थामा पनि दर्शकले हलसम्म आएर चलचित्र हेरिदिनुभयो,’ सोचेभन्दा पनि कार्यक्रम सफल भएकोमा खुशी व्यक्त गर्दै अध्यक्ष गुरुङले भने ।
नेपाली भाषा, कला, साहित्य र संस्कृतिको प्रवद्र्धन गर्ने उदेश्यले ओखलढुंगा सेवा समाजले जेजुदो, सउल, आनसान, ख्वाङजु, देजन, किम्हेलगायतका विभिन्न शहरहरुमा प्रर्दशन गरिने चलचित्रबाट उठेको रकम भने समाजले विभिन्न सामाजिक कार्यमा लगाउने जनाएको छ । प्रणव जोशीको लेखन तथा निर्देशन र माधव वाग्लेको निर्माणमा बनेको हाँस्यप्रधान चलचित्र रेशम फिलिलिमा विनय श्रेष्ठ, मेनुका प्रधान, कामेश्वर चौरासियाको मुख्य अभिनय रहेको छ ।
चलचित्र प्रदर्शन पश्चात थेगुस्थित अन्नपूर्ण सेवा समाजले आपतकालिन राहतकोष स्थापनार्थ संचालन गरेको भाग्यशाली चिठ्ठा पनि खोलिएको थियो । कार्यक्रममा गोलाप्रथाद्धारा छानिएको पहिलो भाग्यशाली चिठ्ठा तौलराम गुरुङलाई परेको थियो । त्यसैगरी दोस्रो र तेस्रो भाग्यशाली चिठ्ठा सविन्द्र तामाङ र नारायण चापागाईलाई परेको थियो ।
