चुम्लुङ कोरियाको ‘रजत जयन्ती विशेष भेटघाट एवम वनभोज कार्यक्रम’ अन्तिम चरणमा
किरात याक्थुङ चुम्लुङ दक्षिण कोरियाले रजत जयन्तीको अवसरमा वृहत याक्थुङ भेटघाट एवम वनभोजको आयोजना गर्ने भएको छ। यस कार्यक्रममा किरात याक्थुङ चुम्लुङ दक्षिण कोरिया केन्द्र, बुसान शाखा, जेजुदो शाखा, र छल्लादो शाखाको सयुक्त आयोजना रहने छ भने कार्यक्रमको तयारी अन्तिम चरणमा पुगेको चुम्लुङ केन्द्रका अध्यक्ष विनोद सौदेनले जानकारी दिएका छन्। 
सेप्टेम्बर ६ र ७ मा छुङछङनाम्दोको थेआन्गुनमा हुन लागेको बृहत बनभोज कार्यक्रममा नेपाली राजदूतावासका राजदूत शिवमाया तुम्बाहाङ्फेको प्रमुख आतिथ्यता रहने छ। वनभोजमा लिम्बू समुदायको परिकारहरुको स्वाद संगै मौलिक संस्कृति यालाङ केलाङको साथमा रम्न पाउने छन । 
संस्थाको रजत जयन्तीको अवसरमा आयोजना गर्न लागिएको उक्त कार्यक्रममा कोरियाको बिभिन्न स्थानहरुबाट लिम्बू समदुय तथा गैर लिम्बू समुदायको व्यक्तिहरुको सहभागिता रहने छ । बनभोज कार्यक्रममा सहभागि हुन जानको लागि सौलको दोङदेमुन संगै सुवनबाट बसको व्यवस्था समेत रहेको आयोजकले जनाएको छ ।
बनभोज कार्यक्रममा सहभागि हुन पुरुषको लागि १ लाख १० हजार वन, महिलाको लागि ९० हजार वन र जोडीको लागि १ लाख ८० हजार कोरियन वन लाग्ने जनाएको छ । बनभोजमा सहभागिहरुले मिष्ठान्न भोजन गर्न पाउनुका साथैै स्विमिङ, बार्बीक्यु र सामुन्द्रिक मनोरञ्जन लिन सकिने छ । बृहत बनभोज कार्यक्रमको तयारी अन्तिम चरणमा पुगिसकेकोले कोरियाबासी सबैलाई सहभागिताको लागि आयोजकले आह्वान समेत गरेका छन् ।
