कोरियामा ‘मान्छेहरु तडपिएर’ र ‘यस्तो स्वार्थी संसारमा’ सार्वजनिक
दक्षिण कोरियाः केही समय यता कोरियामा नेपाली म्युजिक भिडियो बन्ने क्रम तिब्र गतिमा बढेको छ । कोरियाको सफा र सुन्दर शहर अनि यहाँका आकर्षक स्थलहरु नेपाली म्युजिक भिडियोमा छाउन थालेका छन् ।
कामको व्यस्तताका वावजूद पनि कोरियाको सुन्दरतालाई प्रतिभाशाली युवाहरुले आफ्नो सिर्जनासँगै अभिव्यक्त गरिरहेका छन् । त्यसैले त यतिखेर सृर्जनात्मक युवा कलाकारहरुले नेपाली म्युजिक कम्पनीहरुको मन जितेका छन् । समय अभाव, अपुग प्राविधिक उपकरण अनि नेपालको तुलनामा बढी खर्च हुँदाहुँदै पनि नेपालकै जति लगानीमा उत्कृष्ट भिडियो निर्माण गर्ने काममा लागेका छन् नेपाली युवा प्रतिभाहरु ।
यीनै प्रतिभाशाली युवामध्ये एक हुन्,सहदेव भट्ट । सुदुरपश्चिम बैतडीका सहदेव यतिखेर कोरियामा बन्दै गरेको म्युजिक भिडियोमा छाइरहेका छन् । आधा दर्जन म्युजिक भिडियोमा आफ्नो प्रतिभा प्रस्फुटन गरिसकेका भट्टद्धारा निर्देशित एवं अभिनित म्युजिक भिडियो अहिले सर्वाधिक चर्चामा आएको छ ।
सेन्टिमेन्टल आधुनिक गीत र गजलहरुमा बर्चस्व कायम गरेका गायक प्रमोद खरेलको स्वर रहेको गीत ‘मान्छेहरु तड्पिएर रुन्छन् यहाँ किन होला’ म्युजिक भिडियो सार्वजनिक भएसँगै यतिखेर सहदेवलाई धेरै म्युजिक भिडियोमा अफर आइरहेको छ । ‘म थोरै गर्छु तर राम्रो गर्छु,’ उनी भन्छन् ।
वैदेशिक रोजगारीको शिलसिलामा कोरिया आएका भरत सुवेदीको शब्द र डी आर अटुको संगीत रहेको खरेलको उक्त गीतमा सहदेव भट्टलाई साथ दिएकी छिन् कोरियाकी अर्की चर्चित मोडेल गंगा खतिवडाले । कोरियाको विभिन्न ठाउँमा फणिन्द्र भण्डारीले छायांकन गरेको उक्त म्युजिक भिडियोको सम्पादन भने टेकेन्द्र साहले गरेका छन् । यहि गीतबाट निर्देशनमा समेत लागेका सहदेवले यो भन्दा पहिले पनि केहि आधुनिक गीतहरुमा अभिनय गरिसकेको छन् । उनी अभिनित म्युजिक भिडियो सार्वजनिक हुने क्रममा रहेको छ । त्यस्तै अर्का मोडेल गंगा खतिवडा कोरियामा स्थापित र सर्वाधिक रोजाइको मोडेलमा पर्छिन् ।
अंग्रेजी साहित्यमा स्नातक सहदेव पछिल्लो समय कोरियामा धेरै म्युजिक भिडियो बन्दै गरेकोमा खुशी व्यक्त गर्छन् । भन्छन्, ‘तर गुणस्तरीय एकदमै कम छन् ।’ गुणात्मक भन्दा गुणस्तरलाई ध्यान दिए राम्रा म्युजिक भिडियो बन्न सक्ने उनको कथन छ । थोरै गर्ने तर राम्रो गर्ने सोचमा रहेका सहदेव खर्च बढी लागेपनि आर्कषक लोकेसनका कारण नेपाली म्युजिक भिडियोको कोरियामा भविष्य राम्रो रहेको बताउँछन् । भन्छन्, ‘हाम्रो टिमले नेपालकै लगानीमा बनाउने गरेका छौं । भिडियोको संख्या बढाउने रहर छैन गुणस्तरीय बनाउनेमा जोड दिन्छु ।’
त्यस्तै भर्खरै कोरियामा सार्वजनिक गरिएको अर्को नेपाली म्युजिक भिडियो हो फडिन्द्र भण्डारी अर्पणको ‘यस्तो स्वार्थी संसारमा’ । गीतकार भण्डारीको लय संकलन रहेको उक्त गीतमा इतु जोजिजुको स्वर रहेको छ । उक्त गीतको म्युजिक भिडियोमा कलाकार गंगा खतिवडा, आर्यनबिक्रम शाही र स्नेहा लामाले अभिनय गरेका छन् । गीतको छायांकन कोरियाका विभिन्न रमणीय स्थलहरुमा गरिएको छ । उक्त गीतलाई जोजीजु इन्टरटेन्मेन्टले बजार व्यवस्थापन गरेको हो ।
