राजदूत लामाले गरे ‘ढुकुटीको दोहन’
सोल: दक्षिण कोरियाका लागि नेपाली राजदूत कमानसिङ लामाले आफ्नो निवासको भाडा वास्तविकभन्दा बढी देखाएर मासिक दुई लाखभन्दा बढी नेपाली रुपैयाँ अनियमितता गरेको दूतावास स्रोतले आरोप लगाएको छ।
राजदूत निवासका लागि मासिक भाडादर ५० लाख वन दिनेगरी सन् २०१३ मा दूतावास र त्यहाँको एक निजी कम्पनी (फुदोंगसान) बीच सम्झौता भएको थियो। राजदूत लामाले भने परराष्ट्र मन्त्रालय र अर्थ मन्त्रालयलाई मासिक भाडादर ७५ लाख वन बुझाइरहेको सम्झौता देखाएर सरकारी ढुकुटीको अनियमितता गर्दै आएको स्रोतले बताएको छ।
मासिक २५ लाख वन (दुई लाख २५ हजार रुपैयाँभन्दा बढी) सरकारी रकम उनले घुमाउरो बाटोबाट आफैंले लिने गरेको आरोप छ। सोलस्थित दूतावासले परराष्ट्र मन्त्रालयमा पठाएको विवरणअनुसार राजदूत निवासको भाडादर ७५ लाख वन छ।
सन् २०१३ अप्रिलमा दूतावास सरेपछि सोही महिना व्यक्तिगत प्रयासमा लामाले आफ्नो निवास भाडामा खोजेका थिए । राजदूत लामाले फुदोंगसान (घर वा फ्ल्याट भाडामा खोजिदिने कार्यालय) का माध्यमबाट घरभाडा निश्चित गरेका थिए।
होन्ना मदोंगमा रहेको दूतावासलाई सन् २०१३ अप्रिलमा संग्बुकदोंग सारिएको थियो। दूतावाससँगै जोडिएको घर राजदूत लामाले आफ्नो निवासका लागि भाडामा टुंगो लगाएका थिए। स्रोतका अनुसार भाडाबापतको ७५ लाख वन फुदोंगसानको खातामा पठाउने गरिएको छ जसमध्ये २५ लाख वन फुदोंगसानले ‘राजदूतको मान्छे’ खातामा जम्मा गर्ने गरेको छ।
सुरुका केही महिना राजदूत लामाले एक नेपाली युवाको खातामा उक्त रकम जम्मा गर्न लगाई बुझ्ने गरेका थिए। ती युवामार्फत रकम बुझ्दा गोप्यता चुहिनसक्ने आशंकामा आफ्नै भतिजी पूजा लामाको बैंक खातामा डिपोजिट गर्न लगाई उनीमार्फत रकम बुझ्ने गरेको स्रोतको दाबी छ।
पूजाले कोरिया छोडेकाले फिर्ता रकम हालका महिनामा कोरियन नागरिक मियोंन्गमार्फत राजदूतले बुझ्ने गरेका छन्। मियोंन्गले राजदूतसँग मिलेर एमआरपी बनाउन फोटो स्टुडियो सञ्चालन गरेका थिए । एमआरपी बनाउने घटेकाले स्टुडियो बन्द भयो भने मियोंन्गले दूतावासमै नियुक्ति पाए।
बाबुराम भट्टराई प्रधानमन्त्री छँदा लामा एमाओवादी कोटाबाट राजदूत बनेका हुन् । सन् २०१२ मेदेखि कोरियाको राजदूत बनेका लामाको कार्यकाल पाँच महिना बाँकी छ।लामाले अन्नपूर्णसँग भाडाबापत रकम अनियमितता गरेको आरोपमा सत्यता नरहेको बताए।
‘मलाई दूतावास भवन, निवासको भाडा कति छ भन्ने समेत थाहा छैन। सबै दूतावासका कर्मचारीले गर्छन्। कसैले म माथि हावादारी आरोप लगाएको हो, कुनै अनियमितता गरेको छैन,’ हाल काठमाडौंमा रहेका लामाले अन्नपूर्णसँग भने। राजदूत लामाले सरकारको एक रुपैयाँ पनि अनियमितता नगरेको दाबी गरे।
‘केही व्यक्तिहरू मेरो प्रतिष्ठा गिराउन किन लागेका हुन् ? मैले बुझ्न सकेको छैन,’ उनले भने। आरोप प्रमाणित भए आफू कारबाही भोग्न तयार रहेको उनले बताए।उनले फुदोङसानले स्थानीय कर्मचारी मियोन्गमार्फत आफ्नो नाममा पैसा पठाइरहेको भन्ने आरोपमा सत्यता नरहेको बताए।
‘मलाई बदनाम गराउन यस्ता कुरा गरिएका हुन्’, उनले भने। उनले आफ्नो निवासमात्र नभएर दूतावास कार्यालय (चान्सरी), उपनियोग प्रमुखको कार्यालयलगायत भवन फुदोंगसानमार्फत भाडामा लिइएको बताए।
उनले भने, ‘दूतावासमा त्यतिबेला उपनियोग प्रमुख र अन्य कर्मचारी सम्मिलित एक समितिको सामूहिक निर्णयबाट भवन भाडामा लिइएको हो।’ उनले मियोन्गलाई स्थानीय कर्मचारीका रूपमा दूतावासमा भर्ना गरिएको बताए।
‘पूजा लामा मेरो धर्मपुत्री भएकाले कोरिया लगेको हुँ। उनी मकहाँ बसेकी हुन्। अहिले अमेरिकामा छिन्। उनको नामको खातामा फुदोङसानले उक्त २५ लाख रकम बुझाउने गरेको भन्ने कसैले आरोप लगाउँछ भने त्यो मूर्ख हो। म पूजाको सबै बैंक अकाउन्टको विवरण उपलब्ध गराउन तयार छु,’ राजदूत लामाले भने।-अन्नपूर्ण पोस्ट दैनिक
