जापानले पुनर्निमाणका लागि २५ अर्ब ५० करोड रुपैयाँ सहयोग गर्ने
काठमाडौं- जापानले भूकम्पबाट प्रभावित संरचनाहरुको पुनर्निमाणका लागि २५ अर्ब ५० करोड रुपैयाँ सहयोग गर्ने भएको छ |
जापानले गत असार महिनामा भएको दाताहरुको सम्मेलनमा गरेको प्रतिबद्धता अनुसार पुनर्निमाणका लागि २५ अर्ब ५० करोड रुपैयाँ सहयोग गर्ने भएको हो । जापानले २२ अर्ब रुपैयाँ ऋण स्वरुप तथा ३ अर्ब ५० करोड रुपैयाँ अनुदान स्वरुप सहयोग गर्ने भएको हो । जापान अन्तर्राष्ट्रिय सहयोग नियोग (जाइका) र अर्थ मन्त्रालयबीच सोमबार सहयोग सम्बन्धी सम्झौता भएको छ।
जाइकाका अध्यक्ष डा. शिनिची किताओका र अर्थमन्त्री विष्णु पौडेलको उपस्थितिमा अर्थसचिव लोकदर्शन रेग्मी र नेपालका लागि जापानी राजदूत मासासी ओगावाले हस्ताक्षर गर्नुभयो । सम्झौता अनुसार ऋणको रकममध्ये १२ अर्ब रुपैयाँ विद्यालयहरुको तथा १० अर्ब रुपैयाँ घरको पुनर्निमाणमा खर्च हुने छ । अनुदानको ३ अर्ब ५० करोड रुपैयाँ भने भुकम्पबाट प्रभावितहरुको पुर्नस्थापना परियोजना अन्र्तगत प्रसुति गृह र वीर अस्पतालको पुनर्निमाण, सिन्धुपाल्चोकको चौतारामा खानेपानीको पुर्नस्थापना तथा गोरखाको बारपाकमा पुल र सडक निर्माणमा खर्च हुने सम्झौतामा उल्लेख छ । जापानी राजदूत मासासी ओगावाले आफ्नो मुलुकले उपलब्ध गराउने सहायताबाट भुकम्प प्रभावितहरुको राहतमा ठूलो सहयोग पुग्ने विश्वास लिएको बताए।
जापानले गत असार महिनामा भएको दाताहरुको सम्मेलनमा पुनर्निमाणका लागि २७ अर्ब रुपैयाँ बराबरको सहयोग गर्ने प्रतिबद्धता जनाएको थियो । नेपालले ऋण रकम ४० वर्षभित्र तिर्नुपर्ने छ । ऋणमा वार्षिक शून्य दशमलव शून्य एक प्रतिशत ब्याज लाग्ने सम्झौतामा उल्लेख छ । सरकारले भुकम्प प्रभावितहरुलाई घर पुनर्निमाणका लागि प्रतिपरिवार २ लाख रुपैयाँ अनुदान दिने निर्णय गरेको छ । सरकारले ऋणको रकम पीडित परिवारलाई अनुदानको रुपमा दिन पाउने जाइकाले जनाएको छ ।
