कोरियाबाट रुद्र कुलुङलाई सहयोग

सोल- विगत लामो समयदेखि बोनम्यारोका बिरामी रुद्र कुलुङलाई कोरियाबाट सहयोग सहयोग प्रदान गरिएको छ । सोलुखुम्बु जिल्ला छेस्काम ८ निवासी २३ वर्षिय कुलुङको उपचारमा ५० लाख रुपैयाँभन्दा बढी खर्च लाग्ने भएपछि ‘रुद्र बचाउ सहयोग अभियान’ को थालनी गरिएको थियो । यसै अन्तर्गत कोरियाबाट केदार कुलुङको संयोजकत्वमा कोरियामा कार्यरत नेपालीहरुद्धारा आर्थिक सहयोग संकलन गरी हस्तान्तरण गरिएको छ ।
कोरियाबाट उठेको जम्मा रकम ४८ लाख ७० हजार ६ सय २० कोरियन वन काठमाडौंमा नेपाल इन्भेस्टमेन्ट बैंकमा रुद्र बचाउ अभियान समितिको खातामा जम्मा गरिएको छ । यस सहयोग संकलन अभियानमा कोरियाबाट विशेष सहयोग गरिदिने हरिचन्द्र राई, नवाङ शेर्पा, कान्छाकाजी शेर्पालगायत सम्पूर्ण सहयोगी हातहरुलाई संयोजकको तर्फबाट आभार व्यक्त गरेका छन् ।
घरको आर्थिक अवस्था कमजोर भएका रुद्र कुलुङ तीन महिना अघि aplastic  Anemia बोन म्यारो शरीरमा आवश्यक रगत निमार्ण गर्ने सेता र राता रक्तकोष नै सुक्दै गएको हुँदा उक्त रक्तकोष बिजारोपन गर्न धेरै खर्च लाग्ने चिकित्सकले बताएका थिए । छ महिनाभित्र उपचार गरिसक्नु पर्ने चिकित्सकको सुझाव अनुसार कुलुङलाई भारतको नयाँ दिल्लीस्थित अल इन्डिया इन्स्टिच्युट अफ मेडिकल साइन्समा थप स्वास्थ्य परिक्षणको लागि लगिएको थियो । हाल उपचारको लागि काठमाडौंमा नै औषधी खाइरहेका कुलुङलाई तीन महिनापछि उक्त अस्पतालमा उपचार गरिने भएको छ ।