कतारमा प्रबासी कामदारलाई रोजगारी परिवर्तन गर्न सहज हुने
काठमाडौं-कतारले विदेशी कामदारहरुलाई सहज हुने गरी नीतिगत फेरबदल गरेको छ । यसबाट त्यहाँ रहेका नेपाली कामदारहरु पनि लाभान्वित हुनेछन् ।
एक वर्षभन्दा लामो बहसपछि कतारले विवदास्पद ‘काफला स्पोन्सरसिप सिस्टम’मा परिमार्जन गरेको हो । यो परिमार्जनपछि कतारमा रोजगारी परिवर्तन गर्न तथा देश छोड्न आप्रवासीहरुलाई सहज हुनेछ ।
सबैभन्दा महत्वपूर्ण परिवर्तनका रुपमा देश छोड्नका लागि दिइएको निवेदन अस्वीकृत भएको अवस्थामा अपिल गर्ने नयाँ प्रणाली स्थापना गरिने भएको छ । यसका अतिरिक्त आप्रवासीहरुले कुनै रोजगारदातासितको निश्चित करार अवधि सकिएपछि अर्को जागीर खानका लागि स्पोन्सर (प्रायोजक) को स्वीकृति चाहिँदैन ।
यसअघि रोजगारी परिवर्तन गर्न कुनै स्पोन्सरले नो अब्जेक्सन लेटर नदिएको अवस्थामा कामदारले दुई वर्षसम्म प्रतिक्षा गर्नुपथ्र्यो । अब त्यो अवस्था रहेन । यद्यपि परिमार्जित व्यवस्था अर्को वर्ष मात्रै कार्यान्वयनमा आउन सक्ने सरकारी समाचार एजेन्सी क्यूएनएले जनाएको छ ।
अधिकारीहरुले कानूनमा सुधार गर्ने प्रतिबद्धता जनाएको एक वर्ष भइसकेको थियो । पुरानो व्यवस्थाले विदेशी कामदारहरुमाथि अन्याय भइरहेको विषयमा यहाँ रहेका मानवअधिकारवादी संघ-संस्थाले ध्यानाकर्षण गराइरहेका थिए ।
आप्रवासीहरुले यहाँ बैंक ऋण लिन, ड्राइभरको लाइसेन्स लिन तथा कतार छोड्नलाई पनि स्पोन्सरको अनुमति चाहिने व्यवस्था थियो ।
