एनआरएनमा नयाँ नेतृत्वका लागि सहमति प्रयास
काठमाडौं- गैरआवासीय नेपाली संघको नयाँ नेतृत्व चयनका लागि सर्वसम्मत प्रयास थालिएको अध्यक्ष शेष घलेले बताए। सातौं विश्व सम्मेलनको तयारीबारे जानकारी दिन आयोजित पत्रकार सम्मेलनमा घलेले भने, ‘देशको विषम परिस्थितिमा नेतृत्वका लागि हानाथाप गर्नुभन्दा पनि सहमति वा सर्वसम्मतबाट नेतृत्व चयन गर्नु उचित हुने ठानेर तीन सदस्य समिति गठन गरिएको छ। संघको नेतृत्वका लागि उपाध्यक्ष टीबी कार्की र रतन झाले दावी गरेकाले सर्वसम्मतको प्रयास थालिएको हो।’
सर्वसम्मत नेतृत्व चयनका लागि प्रमुख संरक्षक रामप्रताप थापा, पूर्वअध्यक्ष जीवा लामिछाने र दीपक खड्का सदस्य रहेको समिति गठन गरिएको छ।
पत्रकार सम्मेलनमा अक्टुबर १४ देखि १७ सम्म हुने एनआरएन सातौं विश्व सम्मेलनको सम्पूर्ण तयारी पूरा भएको जानकारी गराइयो। कार्यक्रम सम्पन्न गर्न एक करोड रुपैयाँ खर्च हुने र १५ सय प्रतिनिधिले भाग लिने जनाइएको छ। सम्मेलनमा सहभागी हुन २१ सय प्रतिनिधिले नाम दर्ता गराए पनि सबै उपस्थिति हुन नसक्ने अध्यक्ष घलेले बताए।
एनआरएन संस्थागत भइनसकेको तर विगतभन्दा सुधार हुँदै गएको र अबको २० वर्षपछि एनआरएनहरु नेपालको विकास साझेदार बन्ने कार्यक्रममा बताइयो। ‘सातौं विश्व सम्मेलनका लागि नयाँ एजेण्डा केही नभएको पुरानै परियोजनालाई निरन्तरता दिनेछ,’ कार्यक्रममा घलेले भने, ‘विगतमा जस्तो यसपटक गर्न सकिने र सम्भव हुने कार्यक्रम मात्र घोषणापत्रमा उल्लेख हुनेछ।’
नागरिकताको निरन्तरतासम्बन्धी प्रश्नमा घलेले भने, ‘नेपाल सरकारले अहिले एनआरएनको कोटमा बल फालेका छन्। तर एनआरएनको हातमा आइसकेको छैन, कानुन बन्न बाँकी रहेकाले त्यसलाई लविङ गर्ने र नजिकबाट नियाल्न एनआरएनले छाड्न हुँदैन।’
भूकम्प पीडितका लागि एनआरएनले बनाइदिने भनेको एक हजार घर दुई वर्षभन्दा बढी ढिलो गर्न नहुने अध्यक्ष घलेले बताए। ‘नेपाल सरकारको समन्वयमा बन्ने त्यस्ता घर नमूना हुनेछ,’ घलेले भने, ‘भवन विभागको डिजाइनमा बन्ने त्यस्ता घरका लागि एनआरएनले पैतिस करोड रुपैयाँ खर्च गर्नेछ।’
