छाङवनमा माइग्रेंट आरिराङ फेस्टिभल हुने

छाङवन, दक्षिण कोरियाको छाङवन शहरमा हरेक वर्ष आयोजना गरिदै आएको प्रवासीहरुसँगै मनाउने तीनदिने बहुसाँस्कृतिक मेला माइग्रेंट आरिराङ मल्टिकल्चरल फेस्टिभल (MAMF)२०१५ हुने भएको छ । ख्यङनाम माइग्रेन्ट सेन्टरको प्रायोजनामा यहि अक्टोबर २ देखि ४ तारिखसम्म छाङवनको योङजीपार्कमा हुन लागेको सो फेस्टिभलमा विभिन्न स्थानीय कलाकारहरुसहित विभिन्न मुलुकबाट आएका कलाकारहरुले समेत मनोरञ्जन प्रदान गर्ने भएका छन् । यहि क्रममा नेपाललाई चिनाउन तथा नेपालीहरुलाई मनोरञ्जन प्रदान गर्न नेपाली तारा प्रताप लामा समेत कोरिया आइसकेको आयोजकले जनाएको छ ।

महोत्सव अवधिभर विभिन्न देशका खानाका स्टलदेखि विभिन्न आर्कषक खेल तथा आआफ्नो देशको संस्कृति झल्कने पहिरन, सामग्री, कपडाहरु समेत प्रदर्शनी र बिक्रिमा राखिने भएको छ । त्यसैगरी प्रवासी गीतिप्रतियोगिताका साथमा विभिन्न मुलुकको साँस्कृतिक पहिचान सहितका झाँकीहरु प्रदर्शन गरिने भएको छ ।

महोत्सवको अन्तिम दिन नेपाली तारा प्रताप लामाको साँगीतिक प्रस्तुतिका साथै बेलुकी ४ बजे हुने बहुसाँस्कृतिक परेडमा नेपालले पञ्चेबाजासहितको नेपाली भेषभूषा र संस्कृति झल्कने पहिरनमा सहभागिता जनाउने भएको छ । कार्यक्रम स्थलसम्म आउनको लागि नेपालीहरुलाई किम्हे, बुसान, याङसान, थेगु, जिन्जू, हामान, नोकसानबाट बसको व्यवस्था समेत गरिएको माम्फ तयारी समिति नेपालले जनाएको छ ।