इपिएस कोरिया भाषाका १७ नक्कली परीक्षार्थी पक्राउ
काठमाडौं– रोजगार अनुमति प्रणाली(इपिएस)अन्तर्गत शनिबार भएको कोरिया भाषा परीक्षामा अरुका नाममा परीक्षा दिन आएका १७ जना नक्कली परीक्षार्थी पक्राउ परेका छन्।
काठमाडौं उपत्यकाका १५ परीक्षा केन्द्र मध्ये लिटिलएन्जल्स स्कुल हात्तीवनबाट ५ जना, लिटिलएन्जल्स कलेज हात्तीवनबाट २ जना, एनकेसिंह मेमोरियल स्कुल मीनभवनबाट १ जना, भिएस निकेतन कलेजबाट २ जना, एलआरआई कलेज कलंकीबाट ३ जना ल्वारोटरी स्कुलबाट २ जना र ह्वाइट हाउस इन्टिच्युट खुमलटारबाट २ जना पक्राउ परेको इपिएस कोरिया शाखाका कार्यकारी निर्देशक डिल्लिराम बास्तोलाले बताए । पक्राउ परेकाहरुलाई प्रहरीले हिरासतमा राखेको र आवश्यक अनुसन्धान गरी कानुनी कारवाहीमा लगिने उनले बताए ।
गत वर्षको भाषा परीक्षामा ८२ जना पक्राउ परेका थिए ।
शनिबार बिहान र बेलुकी गरी दुई सत्रमा लिइएको परीक्षामा कुल २५ हजार ५ सय ७० जना परीक्षार्थी सहभागी हुनु पर्नेमा कुल २२ हजार परीक्षार्थी मात्र सहभागी भएको उनले जानकारी दिए। इपिएसअन्तर्गत कोरिया भाषा परीक्षाका लागि कुल ५१ हजार १ सय युवाले आवदेन दिएका थिए । आइतबार पनि करिब २५ हजार परीक्षार्थीले परीक्षामा भाग लिने छन् । बिहान साढे आठदेखि बेलुकी ३ः४० मा दुबै सत्रको परीक्षा सम्पन्न भएको थियो । यस वर्षको भाषा परीक्षाका लागि काठमाडौं उपत्यमामा १५ र पोखरामा ३ गरी १८ ओटा परीक्षा केन्द्रमा परीक्षा सञ्चालन भइरहेको छ।
कोरियाले यस वर्षका लागि कुल ७ हजार १ सय कामदारको कोटा निर्धारण गरेको छ । यस मध्ये औद्योगिक क्षेत्रतर्फ ४ हजार ९ सय र कृषि तथा पशुपालनतर्फ २ हजार २ सयको कोटा प्राप्त भएको शाखाले जानकारी दिएको छ। परीक्षा दिएका मध्येबाट त्यती नै संख्यामा उत्कृष्टताको आधारमा कामदार छनोट गर्ने तयारी शाखाको छ। नेपालसहित कोरियाले १५ देशबाट कामदार लाँदै आएको छ।
