छुसकमा ओखलढुंगा सेवा समाजको अर्धवार्षिक भेला हुने

सोल- ओखलढुंगा सेवा समाज दक्षिण कोरियाले नजिकै आइरहेको कोरियन पर्व छुसकको अवसरमा अर्धवार्षिक भेला सहित दिवा भोज तथा मनोरन्जनात्मक कार्यक्रम योजना गर्ने भएको छ |

यहि अगस्त ९ तारिख कोरियाको थेगुस्थित बालाजी रेस्टुरेन्टमा समाजको संरक्षकद्वय बाबुराम गुरुङ तथा विजय राईको उपस्थितिमा समाजका अध्यक्षमान सिंह गुरुङको अध्यक्ष्यतामा बसेको कार्यसमितिको बैठकले अन्य विविध विषय सहित उक्त निर्णय गरेको हो |

बैठकमा समाजले कोरियाको विभिन्न शहरमा प्रदर्शन गरेको नेपाली चलचित्र रेशम फिलिलिको समिक्षा समेत गरिएको थियो | नेपालमा गएको भूकम्प र कोरियामा देखा परेको संक्रामक रोग मर्सको वावजुद पनि समाजले कोरियाको बिभिन्न ५ शहरमा उक्त चलचित्र प्रदर्शन गरेको थियो | मे ३ को थेगुमा भएको पहिलो प्रदर्शनीबाट समाजले प्राप्त मुनाफा मध्य १६,१६,६६६ वन कोरियाको नेपाली राजदुतावास मार्फत प्रधानमन्त्री भूकम्प पिडित राहतकोषमा जम्मा गरेको थियो भने समाजको आव्हानमा जिल्लावासीहरुले कोरियामा संकलन गरेको नेरु २,७५,००० भूकम्प मा परि ज्यान गुमाएका ओखलढुंगाका १९ परिवारलाई राहत स्वरूप प्रदान गरिएको थियो |

बैठकले चलचित्र प्रदर्शनको दौरान भएको सानातिना कमजोरीहरुको वावजुद पनि उक्त चलचित्र सफल प्रदर्शन भएको ठहर गरेको छ | जान अन्जानमा हुन गएका कमि कमजोरीहरुबाट पाठ सिक्दै आगमी दिनहरुमा सच्याउदै जाने र उक्त चलचित्रको प्रदर्शन सफल पार्न सहयोग गर्नु हुने कोरियावासी सम्पूर्ण संघ, सस्था तथा दर्शकहरुलाई समाजले हार्दिक धन्यवाद पनि ज्ञापन गरेको छ |

यसै गरि समाजको आव्हानमा संकलन गरेको भूकम्प पिडित राहत कोषमा सहयोग गर्नु हुने सम्पूर्ण जिल्ल्वासिहरुलाई पनि धन्यवाद दिएको छ भने एनसीसी को १५ औ अधिवेशनबाट सदस्य पदमा निर्वाचीत भएका समाजका सल्लाहकार सन्तोष दाहाललाई पनि सफल कार्यकालको कामना गर्दै वधाई प्रदान गरेको छ |

आगमी छुसकको पहिलो दिन सेप्टेम्वर २६ को दिन थेगुको वेगनमा रहेको नेपाली पसल तथा एभरेस्ट भान्छा घरमा जिल्लावासीहरुवीच समाजको अर्धवार्षिक भेला गरिनेछ | उक्त दिन नव आगन्तुक जिल्लावासीहरुलाई स्वागत गरिनुका साथै समाजले अहिले सम्म भए गरेका प्रगति विवरण तथा आय व्ययको प्रतिवेदन प्रस्तुत गरिनेछ |यसै गरि समाजले आगमी दिनहरुको कार्य योजना तथा कार्यसमितिले प्रस्ताव गरेको विविध विषयहरुमा सामुहिक छलफल गरि निर्णय लिइनेछ | उक्त दिन कोरियामा रहनु भएका सम्पूर्ण ओखलढुंगावासीहरुलाई अनिवार्य उपशितिको लागि समेत समाजले अपिल गरेको छ |