क्यानडाको क्रिमोर भर्टिकल च्यालेन्जमा कान्छीमाया प्रथम
ल्हडुप मोक्तान
क्यानाडा नेपालकी महिला धावक कान्छीमाया कोजूले क्यानडाको क्रिमोर भर्टिकल च्यालेन्जको अल्ट्रा सिरिजमा महिलातर्फ पहिलो हुदैं नयाँ रेकर्ड कायम गरेकी छिन् । गत शनिबार सम्पन्न २५ किलोमिटरको दौडमा ५३ अन्य महिला सहभागीलाई पछि पार्दै उनी पहिलो भएकी हुन् ।
उकालो ओरालो हुँदै अप्ठ्यारो बाटो पार गर्नु पर्ने भएकोले निकै कठिन दौड मानिने भर्टिकल च्यालेन्जको २५ किलो मिटरको दूरी उनले २ घन्टा ५२ सेकेन्डमा पार गरेकी थिइन् । यसअघि यो दुरी चन्तल वरिनरले दुई घन्टा ९ मिनेट ३६ सेकेन्डमा पार गरेको रेकर्ड थियो । कोजुलाई पछ्याउदै मेगान डफीले २ घन्टा ३ मिनेट ३५ सेकेन्डमा दौड पुरा गरी दोस्रो भइन् । केल्ली रुपोलीले २ घन्टा १० मिनेट ३४ सेकेन्डमा उक्त दुरी पार गरेर तेस्रो भइन् ।
अगस्ट ८ मा क्यानडाको टोरोन्टोस्थित क्रिमोरमा भएको उक्त क्रिमोर च्यालेन्जमा ५० किलोमिटर, ५० किलोमिटर, ७५ किलोमिटरको ट्रेल सिरिज गरी तीन सिरिज दौड थियो । अल्ट्रा म्याराथुनमा पुरूष र महिला गरी १२५ जना सहभागी थिए । उक्त खेलमा क्यानाडा निवासी नेपाली मूलका मधु मोक्तानले ५० किलोमिटर दौड पुरा गरेकी थिइन् ।
त्यसैगरी सञ्जीव मोक्तान र डेरिक मोक्तानले २५ किलोमिटर दौड पुरा गरेका थिए । केहि समय अघि नेपालबाट क्यानाडा आएकी धावक कोजुले जुलाई १९ मा ओन्तरियमा सम्पन्न नर्थ फेश ईन्दुरन्स च्यालेन्जको १० किलोमिटर दूरीको दौडमा पनि तेस्रो स्थान हासिल गरेकी थिइन ।
