कोरिया रिटर्नीका लागि सातदिने के-फूड तालिम सम्पन्न
रमेश खावाजु, काठमाडौं । ईपीएसमार्फत नेपाल फर्केका प्रवासी कामदारहरूका लागि कोइका (KOICA) र एचआरडी कोरिया (HRD Korea) को संयुक्त आयोजनामा सातदिने के-फूड (K-Food) तालिम सम्पन्न भएको छ। धुम्बाराहीस्थित हिमालयन हस्पिटालिटी एण्ड ट्रेनिङ सेन्टरमा श्रावण २६ गते सम्पन्न यो तालिममा दक्षिण कोरियाका नेपालस्थित राजदूत पार्क ताए यङ्ग प्रमुख अतिथिका रूपमा उपस्थित थिए।
पार्क ताए यङ्गले सहभागीहरूलाई शुभकामना व्यक्त गर्दै यो तालिमले फर्केका कामदारहरूको सीपलाई बलियो बनाउन र रोजगारी तथा उद्यमशीलताको अवसर बढाउन योगदान गर्ने विश्वास व्यक्त गरे। कोइकाका नेपाल निर्देशक कोङ मू–होनले यो छोटो अवधिको तालिमले प्रवासी कामदारहरूका लागि व्यावहारिक र दीर्घकालीन आधार तयार गर्ने कुरा उल्लेख गरे। कोइकाले नेपालसँग सहकार्य जारी राख्दै फर्केका कामदारहरूको आत्मनिर्भरता र प्रगतिलाई निरन्तर सहयोग गर्ने प्रतिबद्धता जनाए।
श्रम, रोजगार तथा सामाजिक सुरक्षा मन्त्रालयअन्तर्गत आन्तरिक रोजगार महाशाखाका प्रमुख एवं सहसचिव कृष्णप्रसाद सापकोटाले यो तालिमले नेपालको आन्तरिक रोजगार व्यवस्थापनमा महत्वपूर्ण भूमिका खेल्ने कुरा बताए। यस्ता तालिमलाई मुलुकका अन्य जिल्लाहरूमा पनि विस्तार गर्नुपर्नेमा जोड दिए।
यो ४५ घण्टे तालिम कोइकाको के-हामी परियोजनाको पहलमा आयोजित थियो। सन् २०२२ देखि प्रवासी कोरियन कामदारहरूलाई प्रस्थानपूर्व, विदेशमा रहँदा, र फर्केपछि सहायता प्रदान गर्दै आएको यो परियोजनाले कामदारहरूलाई व्यवसायी बनाउन प्रोत्साहन गर्ने लक्ष्य राखेको छ। तालिमका लागि कोरियाका प्रख्यात मास्टर सेफहरू किम ही योन र हा ह्योनसुलाई नेपाल आमन्त्रित गरिएको थियो।
सहभागीहरूले किम्ची (김치), बिबिम्पाप (비빔밥), कोरियन स्ट्यु, र त्तेओक्बोकी (떡볶이) सहित २० भन्दा बढी कोरियन परिकार बनाउन सिके। सहभागी सनम तामाङले यो तालिमले कोरियन खानाको व्यावहारिक ज्ञान प्रदान गरेको र यो सीप भविष्यमा उपयोगी हुने बताइन्। त्यस्तै, कोरियामा १० वर्ष बिताएर सन् २०२० मा फर्केका दिनेश कायस्थले कोरियामा रहँदा समय अभावले यस्ता परिकार बनाउन नसिकेको बताउँदै यो तालिमबाट उत्साहित भएको र चाँडै कोरियन फास्ट फूड रेस्टुरेन्ट सञ्चालन गर्ने योजना रहेको उल्लेख गरे।
के-हामी (K-Hami, 케이하미) परियोजनाले यो तालिममार्फत कोरिया रिटर्नीहरूलाई नेपालमा कोरियन खानाको व्यवसाय सञ्चालन गरी रोजगारी सिर्जना गर्न प्रोत्साहन गर्ने लक्ष्य राखेको छ। तालिममा आठ महिला र सात पुरुष गरी १५ जना सहभागी थिए।
