विविध कार्यक्रम सहित जुलाई २० तारिख भव्य रुपमा ‘नेपाल डे’ मनाईदै
दक्षिण कोरियामा जुलाई २० तारिख आइतवार “नेपाल डे” कार्यक्रम भव्य रूपमा आयोजना हुन लागेको छ। नेपाल सरकार, दूतावास दक्षिण कोरियाको आयोजनामा तथा गैर आवासीय नेपाली संघ (एनआरएनए) दक्षिण कोरियाको सह–आयोजनामा कार्यक्रम हुन लागेको हो।
उत्सवको रुपमा मनाइन लागेको यस कार्यक्रममा नेपाली संस्कृति, भाषा, कला र पर्यटनको अन्तर्राष्ट्रिय प्रचार–प्रसार गर्ने लक्ष्य लिएको छ। कार्यक्रमले कोरियामा रहेका नेपालीहरूबीच सहकार्य, आपसी विश्वास र एकताको वातावरण निर्माण गर्नुका साथै नेपाली र कोरियन समुदायबीच सांस्कृतिक सहकार्यको सेतु बन्ने अपेक्षा गरिएको छ।
हेवा स्टेशन (LINE 4) को EXIT 2 नजिक रहेको मरोनीय पार्कमा बिहान ९ बजेबाट सुरु हुने कार्यक्रममा नेपाललाई विश्वसामु चिनाउने महत्त्वपूर्ण सांस्कृतिक सन्देशहरू प्रस्तुत गरिनेछ। विशेषगरी, बुद्ध नेपालमा जन्मिएको तथ्य र सगरमाथा संसारकै सर्वोच्च शिखर भएको गौरवलाई कार्यक्रमको मूल विषयवस्तुका रूपमा उजागर आयोजकले जनाएको छ। साथै, नेपाली कला, परम्परागत संस्कृति, लोकसंगीत, नृत्य, तथा पर्यटन प्रवर्द्धनमा आधारित विविध कार्यक्रमहरू पनि समावेश गरिने छन्, जसले सहभागीहरूलाई नेपालको सांस्कृतिक विविधता अनुभूति गराउनेछ।
यस कार्यक्रमलाई सफल बनाउन अन्य नेपाली संस्थाहरु नेपाली सम्पर्क समिति (NCC), नेपाल आदिवासी जनजाति महासंघ, नेपाल पत्रकार महासंघ, नेपाली विद्यार्थी समाज (SONSIK) लगायत विभिन्न प्रदेशीय र क्षेत्रीय समाजको विशेष सहकार्य र सहजीकरण हुनेछ।
यस कार्यक्रमले नेपाल–कोरिया सम्बन्धलाई नयाँ उचाइमा पुर्याउने अपेक्षा गरिएको छ, जहाँ सांस्कृतिक आदान–प्रदान र मित्रताको भावना मुख्य केन्द्रमा रहनेछ।
नेपाल सरकारका तर्फबाट महामहिम राजदूत डा. शिवमाया तुम्बाहाङ्फेले कोरियामा रहेका सम्पूर्ण नेपाली राजनीतिक संघसंस्था, जातीय संघहरू, प्रदेश तथा क्षेत्रीय समाज, विद्यार्थी संघ–संस्था, पत्रकारहरू लगायत सम्पूर्ण कोरियावासी नेपाली तथा कोरियन मित्रहरूलाई कार्यक्रममा सहभागिताका लागि हार्दिक निमन्त्रणा गरेका छन्। यो अवसरले नेपाल र नेपाली समुदायको गरिमा झल्काउने विशिष्ट अवसर प्रदान गर्ने विश्वास लिइएको छ।
