कोरियाको सुवनमा भव्यताका साथ ‘साकेला’ मनाइयो
किरात राई यायोक्खा दक्षिण कोरियाले आइतवार सुवनमा साकेला मनाएको छ। कोरियाको ऐतिहासिक स्थल ह्वासमूनको पार्कमा कार्यक्रम आयोजना गरिएको थियो।
नेपाल आदिवासी जनजाति महासंघका अध्यक्ष विशन राईको प्रमुख आतिथ्यमा सम्पन्न कार्यक्रममा पुजारी लोचन राईले आफ्नो परम्परा अनुसार पूजा अनुष्ठान गरेर साकेला नाच सुरु गरेका थिए।
कार्यक्रममा किरात याक्थुङ चुम्लुङले केलाङ समेत प्रस्तुत गरेको थियो। साकेला मनाउनको निम्ति कोरियाकोविभिन्न स्थानबाट नेपाली समुदाय उल्लेख्य रुपमा उपस्थित भएका थिए। साकेला नाचको साथमा राई समुदायको मौलिक परिकारहरुपनि वितरण गरिएको थियो।
यायोक्खाले मे १८ तारिख जेजुदोमा साकेला मनाएको थियो भने जुन १ तारिख बुसानमा मनाइने भएको छ। साकेलाको समापन जुन ८तारिख गजेदो र इक्सान दुइ स्थानमा मनाइने अध्यक्ष पुरन याम्फुले जानकारी गराएका छन्।
किरात राई जातिले उधौली र उभौली साकेला गरेर वर्षमा २ पटक यो चाड मनाउने गर्छन्। वैशाख पूर्णीमाको दिन मनाइने यस चाडलाई उभौली साकेला भनेर पनि भन्ने गरेको पाइन्छ। अन्नबालि लगाउनु पूर्व बालीनाली सप्रीयोस, उब्जनी राम्रो होस भने पितृलाई पूज्दै साकेला सिली नाचेर यो चाड मनाउने प्रचलन रहिआएको छ।
