सकियो माम्फ
आइतबार छाङवनको यङजी पार्क विभिन्न मुलुकको भेषभूषा, कलासंस्कृति र गीतसंगीतको धुनसँगै गुञ्जयमान र सजिसजाउ थियो। १५ मुलुकहरुको सहभागिता रहेको बहुसाँस्कृतिक कार्यक्रम ‘माइग्रेन्ट आरिराङ् मल्टिकल्चरल फेस्टिभल (माम्फ) यो वर्ष पनि मनोरञ्जनात्मक प्रस्तृतिसगैं सम्पन्न भयो।
शुक्रबारदेखि आइतबारसम्म भएको माम्फमा दक्षिण कोरियासहित नेपाल, चीन, जापान, म्यानमार, मंगोल, भियतनाम, थाइल्याण्ड, उजबेकिस्तान, पाकिस्तान, कम्बोडिया, फिलिपिन, श्रीलंका, बंगलादेश र इन्डोनेसियाको भब्य सहभागिता रहेको थियो। विभिन्न मुलुकको कला, संस्कृति र भेषभूषालाई एकै स्थलमा प्रस्तुत गरिने कार्यक्रम माम्फको पहिलो दिन उदघाटन कार्यक्रमको क्रममा बहुसाँस्कृति परिवारका बालबालिकाहरुको आकर्षण प्रस्तुति पछि कोरियाका चर्चित कलाकारहरुले गीत गाएका थिए भने ग्लोबल माइग्रेन्ट डान्सको पनि आयोजना गरिएको थियो। तीन दिनसम्म चलेको माम्फमा मनोरञ्जनात्मक प्रस्तुति सहित, विभिन्न मुलुकको कला संस्कृतिलाई चिनाउने कला प्रदर्शनी र विविध सामग्रीसहितको स्टलहरु राखिएका थिए। त्यसैगरी रमाइला खेलहरुको साथ फुडट्रकमा विभिन्न मुलुकको खानाका परिकारहरु राखिएका थिए।
प्रवासीहरुका लागि गरिने कोरियाकै सबैभन्दा ठुलो महोत्सवमा सहभागी राष्ट्रहरुका राजदूतसहित उच्च निकायका व्यक्तित्वहरुको समेत उपस्थिति रहेको माम्फको मुख्य आकर्षण बहुसांस्कृतिक विविधता परेड ‘धामुन्ह्वा परेड’मा यो वर्ष ‘कलश जात्रा’का साथै शक्तिको प्रतिक नवदुर्गा भवानी, नेपालको सान र पहिचान सगरमाथा र भगवान गौतम बुद्धका प्रतिमासँगै नेपाली परम्परागत विवाहमा अनिवार्य बजाइने मौलिक बाजा ‘पञ्चेबाजा’को धुनसँगै लिम्बू संस्कृतिलाई प्रतिनिधित्व गर्दै च्याब्रुङ नृत्य प्रस्तुत गरिएको थियो।
त्यसैगरी एशियाली संगीत कन्सर्टका लागि विभिन्न मुलुकबाट कलाकारहरु आएर आफ्नो साँगीतिक प्रस्तुती क्रममा नेपालबाट युवा गायक छेवाङ लामाको सहभागिता रहेको थियो। गायक लामाले एशियाली संगीत कन्सर्टमा आफ्ना चर्चित गीत गाएर उपस्थित सबै मुलुकका दर्शकहरुलाई भरपूर मनोञ्जन मात्र दिएनन् गीत संगीतको माध्यमबाट नेपालको परिचय समेत दिएका थिए। गायक लामाले नेपाली स्टेजमा समेत गीत गाएर उपस्थित नेपाली दर्शकलाई मनोरञ्जन प्रदान गरे।
माम्फ कार्यक्रमको नेपाली व्यवस्थापक ख्याङनाम नेपाली समाजले नेपालीहरुको महान चाड दशैं पर्वको आयोजना समेत गर्यो। दशैंको मुखमा परेको माम्फमा सहभागी नेपालीहरुले दशैं मनाएका थिए। नेपाली राजदूतका उपनियोग पुष्पराज भट्टराईले सहभागी नेपालीहरुलाई रातो टिका र जमरा लगाइदिएर प्रवासमा दशैंको याद मेटाइदिएका थिए। दशैं कार्यक्रमसँगै विभिन्न गीतसंगीत, नृत्य, कविता वाचन तथा हाँस्यव्यंग्य जस्ता मनोरञ्जनात्मक कार्यक्रमहरु गरिएको थियो।
माम्फका केही झलकहरु:
