तमू धीं दक्षिण कोरियाको दशौं केन्द्रीय महाधिवेशन आउँदो जूलाई २ मा हुने
तमू (गुरुङ) समुदायको गौरवमय संस्था तमू धीं दक्षिण कोरियाको ऐतिहासिक दशौं केन्द्रीय महाधिवेशन हुने भएको छ । संस्थाले आफ्नो दुई वर्षको कार्यकाल सफलतापूर्वक पूरा गरेको र विधिवत् रुपमै अर्को कार्यसमिति चयन गर्नुपर्ने प्रावधान अनुसार आउँदो जूलाई २ तारिक सउल दोङ्देमुन स्थित नेपाल थाई रेष्टुरेन्टको सभा हलमा उक्त महाधिवेशन हुने भएको हो ।
उक्त आसन्न दशौं केन्द्रीय महाधिवेशनका लागि संस्थाका संरक्षक भिम गुरुङ (पर्वत) संयोजक रहने गरि खोम प्रसाद गुरुङ (कास्की), भिम गुरुङ (लमजुङ), युवराज गुरुङ (स्याङ्जा) र कुमार गुरुङ (स्याङ्जा) सहित ५ सदस्यीय निर्वाचन मण्डल समिति गठन गरिएको र महाधिवेशनको सम्पूर्ण तयारी भईसकेको केन्द्रीय अध्यक्ष लेसन गुरुङले जानकारी दिए ।
सन् १९९९ मा स्थापना भएको तमू धीं दक्षिण कोरियाले संस्थाले विभिन्न कालखण्डमा उदाहरणीय सामाजिक कार्यहरु सहित तमू (गुरुङ) जातिको आफ्नो मौलिक भेषभूषा, संस्कार, संस्कृति तथा परम्परा लगायतको जगेर्ना गर्ने पवित्र कार्यमा संस्थाले महत्वपूर्ण टेवा पुर्याईरहेको सन्दर्भ वरिष्ठ उपाध्यक्ष रुपा गरुङले उल्लेख गरिन् । कोरियामै आफ्नो तीन शाखा विस्तार र विकास गर्दै विगत लामो समयदेखि तमू धीं सेल्टर पनि सञ्चालनमा ल्याई नेपालीहरुलाई सेवा प्रदान गरिरहेको संस्थाको महासचिव सन्तोष गुरुङले स्पष्ट पारे ।
तमू धीं दक्षिण कोरियाको ऐतिहासिक आसन्न दशौं केन्द्रीय महाधिवेशनलाई सभ्य र भव्य रुपमा सम्पन्न गर्न संस्था सम्बद्ध कोरियावासी तमू दाजुभाई तथा दिदिबहिनीहरु तथा शुभचिन्तकहरुलाई गरिमामय उपस्थितिका लागि तमू धीं दक्षिण कोरियाले अनुरोध गर्दै हार्दिक निमन्त्रणा गरेको छ ।
