कोरियामा रहेका नेपालीले बुद्धजयन्ती मनाए

दक्षिण कोरियामा रहेका नेपालीहरुले राजधानीसँगै जोडिएको सहर आन्सान बुद्धजयन्ती मनाएका छन् । आइतबार भएको कार्यक्रममा सोल छेउछाउ रहेका नेपालीहरुको उल्लेखनीय सहभागिता रहेको थियो ।
धेरै विदेशी बस्ने सहरको रुपमा चिनिएको आन्सानमा विहान १२ बजे देखि बुद्ध नेपालमा जन्मिएका हुन् भन्ने नारा सहित सहर परिक्रमा गरिएको थियो । ‘यहाँका धेरै कोरियालीहरुलाई बुद्ध नेपालमा जन्मिएका हुन् भन्ने थाहा छैन् । यस्तो कार्यक्रमहरुले नेपालमा हिमाल मात्रै होइन बुद्ध धर्मालम्बीको लागि एउटा धार्मिक गन्तब्य पनि छ भन्ने जानकारी हुन्छ । हामीले सबै मिलेर सकेको प्रचार गर्न सके सकारात्मक शन्देश जान्छ ।’ नेपाल आदिवासी जनजाति महासंघ दक्षिण कोरियाका कार्यवाहक अध्यक्ष विशन राईले भने ।
नेपाली राजदूतावास, नेपाल आदिवासी जनजाति महासंघ, गैर आवासीय नेपाली संघ ख्यङ्गीईन्छन शाखा र सनातन साहित्य संगित साधना समूह मिलेर कार्यक्रमको आयोजना गरेका हुन् । कार्यक्रम सहभागि भएका थारू कल्याणकारी सभाका अध्यक्ष शिव शंकर महताे थारुलाई कोरियाको ठाउँमा भएको कार्यक्रम सकारात्मक रहेको बताए । ‘आज विहान पनि पानी परेको थियो । कोरियालीहरुले बुद्धका बारेमा सुनेका छन् । यसरी सार्वजनिक रुपमा कार्यक्रम गर्दा उनीहरुमा पनि चासो बढ्ने रहेछ । हामी सहर परिक्रमा गर्दा पनि धेरै कोरियालीले साचो पुर्वक हेरेका थिए ।’ उनले भने ।
कोरियालीहरुले पनि बुद्ध जयन्ती मनाउने भए पनि नेपालको बुद्धजयन्ती भन्दा पछि मे महिनाको २७ तारिखमा मनाउँदैछ । बुद्ध पृथ्वीमा आउनु भएको दिन अर्थात ‘बुछनीम ओसिननाल’ भनिने कोरियामा सार्बजानिक बिदा दिनुको साथै यहाँ रहेका गुम्बा चैत्यमा पुजा गर्ने चलन छ । सन् २०१५ गरिएको जनगणना अनुसार ७६ लाख कोरियालीहरु बौद्ध धर्म मान्ने गर्छन् । कोरियाको राजधानी सोलमा बर्षिनी ५ लाख भन्दा बढि मानिसहरु सहभागी भएर ‘लोटस ल्यान्टर्न फेस्टिभल’ मनाउने गर्छन् । सो फेस्टिभलमा १ लाख भन्दा बढि लालटिनहरु बालिने गरिन्छ । विश्वका ३० भन्दा बढि देशका बौद्ध धर्मालम्बीहरु सहभागी हुने यो फेस्टिभल संसारका ठूला बौद्ध धार्मिक महोसत्वमा पर्छ भने युनेस्कोले ईन्टेन्जीवल कल्चरल हेरिटेजको लिस्टमा समाबेश गरेको छ ।

थप तस्विर