दक्षिण कोरियामा मानसिक स्वास्थ्य सम्बन्धी कार्यक्रम सम्पन्न

दक्षिण कोरियामा रहेका नेपालीहरुलाई लक्षित गर्दै मानसिक स्वास्थ्य सम्बन्धी कार्यक्रम सम्पन्न भएको छ ।

गैर आवासीय समन्वय परिषद (NRNA) ख्यङ्साङ्नाम्दो बुसान साखाको सहकार्यमा धैर्य क्यान्सर फाउन्डेसनले आइतवार (जनवरी ५) उक्त मानसिक स्वास्थ्य सम्बन्धी कार्यक्रमको आयोजना गरेको थियाे ।

अन्लाइन माध्यम जूम मार्फत भएको कार्यक्रममा काउनसिलिङको कार्य धैर्य क्यान्सर फाउन्डेसनकी फाउन्डर तथा अध्यक्ष टेरिसा तामाङ्ले गरेका थिए । कार्यकमलाई प्रभावकारी बनाउने उद्देश्यले थोरै जनालाई मात्र सहभागी गराएको थियो । सबैको सकृय अन्तर्कृयात्मक सहभागितामा कार्यक्रम सम्पन्न भएको हो । काउन्सिलर तामाङले कार्यक्रमको अन्त्यमा यस्तो थोरै सहभागितामा पनि कोरियामा मानसिक स्वास्थ्य सम्बन्धी कति धेरै समस्याहरु रहेछन् भन्ने कुरा थाहा पाएको भन्दै आगामी दिनहरुमा थप यस्तै कार्यक्रमहरु गर्ने बताए । “मैले सोचेकै थिएना कि दक्षिण कोरियामा मानसिक स्वास्थ्य सम्बन्धी यति धेरै समस्याहरु छन् भनेर । यहाँ रहेको संस्थाहरुसाँगको सहकार्यमा यस्तै थप प्रभावकारी कार्यक्रमहरू सञ्चालन गर्न म तयार छु ।” तामाङले बताइन् ।

अहिले विश्वमा नै मानसिक स्वास्थ्य समस्या विकराल समस्याकाे रूपमा देखा परेकाे छ । यसैलाई मध्यनजर गर्दै धैर्य क्यान्सर फाउन्डेसनले याे हप्ता मात्र २ वटा यस्ता कार्यक्रमहरू सञ्चालन गरिसकेकाे जनाएकाे छ ।

“धैर्य क्यान्सर फाउन्डेसन (DCF) नेपालमा स्थापित एक गैर-नाफा मुलक राष्ट्रव्यापी सामाजिक संस्था हो। DCF नोभेम्बर २०१७ मा टेरिसा तामाङ द्वारा स्थापना गरिएको थियो। मानसिक रोग शारीरिक रोग भन्दा बढी पीडादायी छ। तसर्थ, नेपालमा अवस्थित यस क्यान्सर संगठनको मुख्य उद्देश्य क्यान्सर पीडित व्यक्ति र उनीहरूको परिवारलाई व्यावहारिक, भावनात्मक र सामाजिक सहयोग, सचेतना कार्यक्रम, क्यान्सर सम्बन्धी स्वास्थ्य शिविर र क्यान्सर रोगीहरूको लागि आवस्यक जानकारी सहयोग प्रदान गर्नु हो।” धैर्य फौन्डेसनको वेवसाइडमा लेखिएको छ ।