स्याङ्जा परिवार दक्षिण कोरियाको बाह्रौं केन्द्रीय अधिवेशन जनवरी २१ मा हुने
केही महिना अघि मात्रै धूमधामका साथ रजत जयन्ती मनाईसकेको कोरिया स्थित गौरवमय क्षेत्रीय संस्था स्याङ्जा परिवारको बाह्रौं केन्द्रीय अधिवेशन यही आउँदो जनवरी २१ तारिकमा हुने भएकाे छ । संस्थाको एघारौं कार्यसमिति सफलतापूर्वक कार्यकाल पूरा भई आधिकारिक र विधिवत् रुपमा अर्को कार्यसमिति चयन गर्नुपर्ने आवश्यकतालाई ध्यानमा राख्दै सउल जोंगाक स्थित दुर्गा रेष्टुरेन्टको छिहा हलमा सो अधिवेशन हुने भएकाे हो ।
सन् १९९७ मा स्थापना भएको “स्याङ्जाली एकता उपकारी मन, सद्भावसँगै बिताऔं परदेशी जीवन” भन्ने मूल नारालाई अनुशरण गर्दै आइरहेको संस्थाले स्याङ्जा जिल्लाबाट विभिन्न पेशा, व्यवसाय तथा रोजगारीको शिलशिलामा कोरियामा रहेका स्याङ्जालीहरुलाई आबद्ध गराउँदै विभिन्न परोपकारी र सामाजिक क्रियाकलापमा सक्रिय रहँदै आएको सोही संस्थाको केन्द्रीय अध्यक्ष विजय थापाले बताए । कोरियामा आफ्नो दुई शाखाहरु विस्तार गरिसकेको र झण्डै एक दशक यता सेल्टर स्थापना गर्दै सेवा प्रदान गरिरहेको सन्दर्भ केन्द्रीय सचिव माधव अर्यालले थपे । स्याङ्जा परिवारले विशेषत: कोरियामा रहेका स्याङ्जाली र समग्र नेपालीहरु मात्रै नभएर आफ्नै गृह जिल्लाको विकास र हितको निमित्त थुप्रै परोपकारी कार्यमा अग्रसर रहँदै गृहजिल्लामा दुईवटा एम्बुलेन्स भ्यान समेत भित्र्याईसकेको संस्थाका केन्द्रीय वरिष्ठ उपाध्यक्ष विपना गुरुङले स्पष्ट पारे ।
उक्त बाह्रौं अधिवेशनलाई सभ्य र भब्य रुपमा सफल बनाउन संस्था सम्बद्ध सल्लाहकार, बुद्विजीवी, शुभचिन्तक, समस्त सदस्यहरुलाई स्याङ्जा परिवार शाखाले गरिमामय उपस्थितिको लागि हार्दिक अनुरोध गरेको छ ।
तपसिल :
मिति : २०२१ जनवरी २१, शनिबार
समय : दिनको ठिक ११:०० बजे
स्थान : सउल जोंगाक स्थित दुर्गा रेष्टुरेन्टको छिहा हल
