कोरियाको बुसानमा विविध साँस्कृतिक कार्यक्रम सहित तमू ल्होसार धूमधाम मनाईयो
तमू धीं ख्यङ्साङ्नाम्दो बुसान शाखाले तमू (गुरुङ) समुदायको नयाँ वर्ष तथा मौलिक पर्व तमू ल्होसार गत आइतबार बुसान स्थित जिकेएस हलमा भव्य रुपले मनाएको छ । तमू समुदायको वर्ग चक्र अनुसार तो-ल्हो (बाघ वर्ग) लाई विदाई र ही-ल्हो (बिरालो वर्ग) लाई स्वागत गर्दै दिवा भोज, शुभकामना आदानप्रदान तथा विविध साँस्कृतिक कार्यक्रम सहित सो ल्होसार मनाएको हो ।
“प्ये म्हस्याँ छ्या म्हमु, छ्या म्हस्याँ ल्हु म्हमु, ल्हु म्हस्याँ म्हि म्हमु” अर्थात् “शास्त्र हराए, संस्कार हराउँछ, संस्कार हराए संस्कृति हराउँछ, संस्कृति हराए मान्छे (जाति) नै हराउँछ ।” भन्ने तमू (गुरुङ) समुदायको विश्वब्यापी नारालाई आत्मासाथ गर्दै आईरहेको तमू धीं दक्षिण कोरिया ख्यङ्साङ्नाम्दो बुसान शाखामा अध्यक्ष कर्ण गुरुङको सभापतित्वमा सम्पन्न सो कार्यक्रममा संस्थाका उपाध्यक्ष विक्रम गुरुङले स्वागत मन्तव्य दिएका थिए ।
सो कार्यक्रममा प्रमुख अतिथिको रुपमा नेपाल आदिवासी जनजाती महासंघ बुसान शाखाकी अध्यक्ष परी गुरुङ, विशेष अतिथिहरुमा गैर आवासीय नेपाली संघ (NRNA) दक्षिण कोरियाका केन्द्रीय वरिष्ठ उपाध्यक्ष सञ्जीव कुमार राई, एनसिसि बुसान अध्यक्ष संगीत अधिकारी, न्यू भिजन ग्रुपका सचिव जीवन शर्मा, नेपाल तामाङ घेदुङ बुसान शाखाका अध्यक्ष धनराज तामाङ, नेपाल मगर संघ बुसान शाखाका अध्यक्ष दिल तारमी मगर, किराँत याक्थुङ चुम्लुङ बुसानका अध्यक्ष सञ्जोग कन्दवा, किराँत राई यायोक्खा बुसानका अध्यक्ष हेमन्त खिम्बुले राई, तमू धीं ख्यङ्साङ्नाम्दो बुसान शाखाका संरक्षक गोपाल गुरुङ लगायत विभिन्न जातीय, क्षेत्रीय, राजनैतिक, धार्मिक संघसंस्थाको अध्यक्ष एवं प्रतिनिधि साथै संस्था सम्बद्ध व्यक्तित्वहरुको उपस्थिति रहेको थियो ।
संस्थाका निवर्तमान अध्यक्ष तथा वरिष्ठ सल्लाहकार अनिश गुरुङको संयोजकत्व रहेको सो ल्होसार कार्यक्रमको औपचारिक र साँस्कृतिक कार्यक्रम तेजु गुरुङले सञ्चालन गरेका थिए । स्थानीय कलाकारहरुको बेजोड मौलिक साँस्कृतिक प्रस्तुति रहेकाे उक्त कार्यक्रममा गायक हेमन्त गुरुङ र अतिथि कलाकार अर्जुन लिम्बुको सांगीतिक प्रस्तुतिले भरपूर मनोरञ्जन प्रदान गरेको थियो । कार्यक्रममा उल्लेख्य बाक्लो उपस्थिति रहेको तमू धीं ख्यङ्साङ्नाम्दो बुसान शाखाद्धारा आयोजित उक्त “तमू ही-ल्होसार २०७९” लाई सभ्य र भव्य सफल बनाउन उपस्थित सम्पूर्ण महानुभावहरुलाई आयोजक संस्थाले धन्यवाद व्यक्त गरेको छ ।
अन्य फोटोको लागि संस्थाको फेसबुक पेज हेर्नुहोला ।
https://www.facebook.com/tamudhibusan
