राईको ‘थ्री ईन वान’ एकल चित्रकला प्रदर्शनी तयारी अन्तिम चरणमा
धन गुरुङ्
सोल कोरिया
दक्षिण कोरियाको राजधानी दोङ्देमुन, नेपाली शहरमा हुन लागेको युवा चित्रकार एलबिक्रम राईको ‘थ्री ईन वान’ एकल चित्रकला प्रदर्शनीको तयारी अन्तिम चरणमा पुगेको छ ।
अगामी २६ तारिकमा दोङ्देमुनको शुमेच्छा रेष्टुरेण्टमा औपचारिक उद्घाटन हुने एकल चित्रकला प्रदर्शनीको लगभग सबै तयारी पुरा भएको चित्रकार राईले जानकारी दिए ।
उनको अनुसार चित्रकला प्रदर्शनीको उद्घाटन सत्रका लागि सबै अतिथिहरुलाई निमन्त्रणा पर्ठाइ सकिएको छ । त्यस्तै पोस्टर, ब्यानर तथा अन्य प्रचार प्रसारको काम पनि सकिएको छ । प्रदर्शनीमा राखिने चित्रहरु समेत तयार र्भइसकेको छ ।
एकल प्रयासमा तयार पारिएका चित्रकलाहरु शुभेच्छा रेष्टुरेण्टको संयोजनमा एक महिनासम्म प्रदर्शनमा राखिनेछ ।
प्रदर्शनीमा वाटर कलर र एक्रोलिक कलरको मिश्रणबाट पेन्ट गरेका करिब ६० वटा चित्रकलाहरु प्रदर्शनीमा राखिने तयारी भएको बताईएको छ ।
प्रदर्शन गरिने चित्रकलाले नेपालको चिनारीहरु विश्व शान्तिको अग्रदुत गौतम बुद्ध जन्मिएको देश नेपाल, विश्वकै सबै भन्दा अग्लो हिमाल सगरमाथाको देश नेपाल र विश्वमै जातीय, धार्मिक, सांस्कृतिक, भाषिक बिविधता भएको देश नेपाल भन्ने सन्देश दिने भएकाले प्रदशनीको नाम ‘थ्री ईन वान’ राखिएको राईले बताए ।
उदयपुर, कतारी–५ स्थाई घर भएका राई करिब २ वर्ष अगाडी कृषि क्षेत्रको कामदारको रुपमा कोरिया आएका हुन् । राई कोरियाको याङ्जुसीमा अण्ड उत्पादन गर्ने कम्पनीमा कर्यरत छन् ।
राईले कम्पनीको कामको बाब्जुत खाली समय निकालेर विभिन्न चित्रकलाहरु पेन्ट गर्ने गरेका छन् ।
राईले नेपालमै रहँदा समेत करिब दर्जन बढि प्रदर्शनीमा आफ्नो चित्रकला प्रदर्शन गरिसकेका छन् । उनले नेपाल हुँदा आर्ट टिचरको रुपमा समेत गरेको बताईन्छ ।
यस पटक कोरियामा गर्न लागिएको एकल चित्रकला प्रदर्शनी भने चित्रकार राईको पहिलो ‘एकल चित्रकला’ प्रदर्शनी हो ।
राईले सबै कोरियामा रहेका नेपाली दाजुभाई दिदि बहिनीहरुलाई चित्रकला प्रदर्शनी अवलोकन गरी सल्लाह, सुझाव र हौसला दिनुहुन समेत अनुरोध गरेको छ ।
