विश्वव्यापी अनलाइन तमू साँस्कृतिक नृत्य प्रतियोगिताको पुरस्कार वितरण माघ २ गते पोखरामा गरिने
तमू धीं दक्षिण कोरियाको आयोजना र साँस्कृतिक विभागको मुख्य संयोजनमा सम्पन्न विश्वव्यापी अनलाइन तमू साँस्कृतिक नृत्य प्रतियोगितामा विजेताहरुलाई आउँदो माघ २ गते पुरस्कार वितरण गरिने भएको छ । कास्की जिल्लाको लेकसाइड पोखरास्थित प्राईम होटलमा सम्बन्धित सबैलाई आमन्त्रण गरी उक्त पुरस्कार प्रदान गरिने भएको हो ।
सो नृत्य प्रतियोगितामा प्रतियोगी नं. १ तमू फ्रे छमी धीं (सोरठी नृत्य) स्याङ्जा वालिङले प्रथम स्थान, प्रतियोगी नं. ३ सिर्सेकोट समाज (घाँटु नृत्य) स्याङ्जाले द्धितिय स्थान र प्रतियोगी नं. १० पसगाउँ लमजुङले तृतीय स्थान हासिल गर्दै ट्रफी र प्रमाण पत्र सहित क्रमशः नगद रु. पचास हजार, तीस हजार र पन्ध्र हजार प्राप्त गर्दै पुरस्कृत हुनेछन् भने प्रतियोगी नं. ४ पैंयुखोला तमू समाज काजीपोखरी १४, कास्की पोखराका समूहले उत्कृष्ट भेषभूषाको विधातर्फ ट्रफी र प्रमाण पत्र सहित नगद रु. दश हजार प्राप्त गर्नेछन् । प्रतियोगितामा एकल वा सामूहिक रुपमा जम्मा १८ प्रतियोगीहरुको सहभागिता रहेको थियो ।
तमू धीं दक्षिण कोरियाले यही जनवरी २ तारिक सउलस्थित नाम्यङ्ग सागरीमा रहेको हाम्रो नेपाली चुल्हो रेष्टुरेन्टमा यस वर्षको तमू ल्होसार मनाएको थियो । नेपालबाट जूम भर्चूअल मार्फत जोडिएर यस वर्षको ल्होसारलाई अझ विशेष बनाउन प्रमुख अतिथिको रुपमा रहनुहुने तमू ह्यूल छोंज धीं गुरुङ राष्ट्रिय परिषद काठमाण्डौका अध्यक्ष रेशम गुरुङ, विशेष अतिथिहरु तमू धीं नेपालका अध्यक्ष हुम बहादुर गुरुङ, बौद्ध अर्घौ सदन पोखराका अध्यक्ष भुवनसिं गुरुङ र सोही सदनका लामा प्रमुख खेन्पो शिर लामा गुरुङ, प्ये ल्हु संघ नेपालका पच्यु चिवा ठौ बहादुर गुरुङ, उहाँहरु सम्बद्ध संस्थालाई मायाको चिनो सहित सम्मान गर्ने कार्यक्रम रहेको छ । कवि तथा साहित्यकार तेज बहादुर च्हाक्ली गुरुङ, गायन क्षेत्रका चर्चित कलाकारद्धय ममता गुरुङ र तिलक गुरुङलाई मिठो प्रस्तुतिको लागी सोही पुरस्कार वितरण कार्यक्रमका विच सम्मान गरिने तमू धीं दक्षिण कोरियामा केन्द्रीय अध्यक्ष लेसन गुरुङले जानकारी दिए ।
विजेताहरु सबै पश्चिमाञ्चल क्षेत्रभित्रको भएकोले सबैको सुविधा र सहजतालाई मध्यनजर गर्दै तमू धीं दक्षिण कोरियाका पूर्वाध्यक्ष सूरज गुरुङको संयोकत्वमा गठित उपसमितिले पोखरामा उक्त पुरस्कार वितरण कार्यक्रमको तय गरिएको संस्थाका केन्द्रीय महासचिव सन्तोष गुरुङले बताए । कार्यक्रममा मिडिया पार्टनर्सको रुपमा रहेका छ्याजालो न्यूज, गोर्खाली रेडियो, रोधीं डिजिटल र फोनिज कोरियालाई पनि सम्मान जोड्दै पुरस्कृत बाहेकका सहभागी बाँकी १४ प्रतियोगीहरुलाई समेत प्रतिभाको कदर गर्दै सम्मान पत्र प्रदान गरिने संस्थाका केन्द्रीय वरिष्ठ उपाध्यक्ष रुपा गुरुङले थपिन् ।
उक्त पुरस्कार वितरण कार्यक्रमको नेपालमा रहेका तमू धीं दक्षिण कोरियाका भुपु अध्यक्ष, वरिष्ठ सल्लाहकार, सल्लाहकार कार्यसमितिका पदाधिकारी एवं सदस्यहरु, संस्था सम्बद्ध अग्रज व्यक्तित्वहरु लगायत पुरस्कृत र सम्मानित हुनुहुने प्रतियोगी र व्यक्तित्वहरुलाई अग्रिम बधाई सहित उपस्थितिको लागी तमू धीं दक्षिण कोरियाले हार्दिक अनुरोध गरेको छ ।
